Ҳожатхона қувурига 'тушиб кетган' чақалоқ қандай қутқарилди?

Хитойнинг Чжэцзян вилояти Цзиньхуа шаҳридаги ҳожатхона оқава қувурида тиқилиб қолган чақалоқ қутқариб олинган.

Би-би-си мухбири маҳаллий матбуотга таяниб, полиция ҳодисага қотиллик уриниши сифатида қараётгани ва боланинг ота-онасини қидираётгани айтганди.

Аммо, Франс Пресс агентлигига гапирган маҳаллий полиция зобити гўдакнинг турмуш қурмаган онаси ҳомиладорлигини яширгани ва чақалоқ туғиш пайти "тасодиф билан" ҳожатхонага тушиб кетганини билдирган. Унинг айтишича, аёлнинг ўзи буни тан олган. Зобитга кўра, ҳозир полиция у қасддан бу ишни қилганми йўқлигини текширмоқда. Гўдакнинг отаси ҳақида эса, ҳозиргача бирон маълумот аниқланмаган.

Бор-йўғи бир неча кунлик дейилаётган ушбу чақалоқ ҳозир шифохонада қолмоқда.

Касалхонадаги инкубатор рақами бўйича "59-номерли бола"га одамлар сут, памперс ва кийим-кечаклар олиб келишаётгани хабар қилинганди.

30 йилдан ортиқ вақтдан бери Хитой "Бир оила-бир бола" сиёсатига қаттиқ амал қилади. Бироқ, бунга хилоф иш тутган ота-оналар жарима билан қутилиб қолишлари мумкин.

Айни пайтда Хитойда турмушдан ташқари ҳомилаларни аборт қилдириш ва ё туғиб ахлат қутисига ташлаб кетиш ҳодисалари ҳам кузатилган.

Хитой оилаларида ўғил бола кўпроқ қадрлангани боис, қиз чақалоқлардан воз кечиш ҳоллари ҳам учраб туради.