Нетаняҳу янада жиддий масала бўйича сўроқ қилинди, АҚШ Эронни бомбаламоқчи, Трамп нега Путиндан "аччиқланди"?

Исроил Бош вазири ўта жиддий масала бўйича кўрсатма бермоқда, полиция унинг икки ёрдамчисини ҳибсга олган. АҚШ Эрон ядровий дастур бўйича тўғридан-тўғри музокаралардан бош тортса мамлакатни бомбардимон қилмоқчи. Трамп нега Путиндан аччиқланди?

Қатаргейт: Нетаняҳуни махсус бўлим сўроқ қилди, маслаҳатчилари ҳибсда

Сўнгги бир неча кун ичида Исроилда "Қатаргейт" деб ном олган можаро билан бевосита боғлиқ бир қатор воқеалар рўй берди. Хусусан, душанба куни кечқурун бу иш доирасида Бош вазир Бенямин Нетаняҳу сўроқ қилинди.

У Қуддусдаги ўз қароргоҳида, ўта оғир жиноятларни тергов қилиш бўлими терговчиларига кўрсатма берди. Улар билан учрашувга улгуриш учун, у душанба куни эрталаб Тел-Авивдаги округ судидан зудлик билан чиқишига тўғри келди. Нетаняҳу судда коррупцияга оид бошқа жиноят иши бўйича кўрсатма бераётган эди.

Тел-Авивдаги жараён "Қатаргейт" билан солиштирганда анча енгилдек кўринмоқда. Бу ишда Бош вазир маслаҳатчиларининг Қатар манфаатларини ҳимоя қилишдаги эҳтимолий иштироки тергов қилинмоқда.

Бу босқичдаги терговда Нетаняҳу гумондор сифатида эмас, балки гувоҳ сифатида қатнашмоқда. Аммо душанба куни полиция унинг икки асосий ёрдамчиси — Жонатан Урих ва Эли Фелдштейнни ҳибсга олди, улар асосий гумондорлар сифатида кўрилмоқда.

Исроил манбаларининг хабар беришича, Нетаняҳунинг кўрсатмалари синчиклаб ўрганилади, шундан сўнг Бош прокуратура мазкур иш доирасида унинг мақомини ўзгартириш учун асос бор-йўқлигини ҳал қилади.

Трамп Эронга зарба бермоқчи, Теҳрон бевосита музокаралардан бош тортди

АҚШ Президенти Доналд Трамп агар Вашингтон ва Теҳрон Эрон ядровий дастури бўйича келишувга эриша олмаса, АҚШ Эронга зарба беришини билдирди.

"Агар улар келишув тузмаса, бомбардимон бўлади. Бу улар ҳеч қачон кўрмаган даражадаги бомбардимон бўлади", — деди Трамп NBC News телеканалига берган интервюсида. Шунингдек, у Эрон маҳсулотларига қарши янги иккилламчи санкциялар қўлланиши мумкинлигини айтди.

Шу билан бирга, президент Вашингтон ва Теҳрон ўртасида "алоқалар мавжуд"лигини таъкидлади.

Трампнинг Хоманаийга мактуби ва икки ойлик муддат

Axios нашрининг Америка расмийлари ва бошқа икки манбага таяниб хабар беришича, Трамп Эроннинг олий раҳбари Оятулло Али Хоманаийга мактуб юборган. Унда Теҳронга янги келишувни имзолаш учун икки ой муҳлат берилган.

Нашрга кўра, Трампнинг мактуби "қатъий" бўлган. Унда АҚШ президенти янги ядроий келишув бўйича музокаралар ўтказишни талаб қилган ва агар Теҳрон уни рад этса, оқибатлари жиддий бўлишидан огоҳлантирган.

Axios'нинг маълум қилишича, Трамп мактубда музокараларни чўзишни хоҳламаётганини билдирган ва икки ойлик муддат белгилаган. Аммо бу муддат мактуб олинган кундан бошлаб ҳисобланадими ёки музокаралар бошланганидан кейинми — аниқ эмас.

Нашр манбаларига кўра, Оқ уй мактуб мазмуни ҳақида бир нечта АҚШ иттифоқчилари — Исроил, Саудия Арабистони ва БААга хабар берган.

Хоманаий: "Агар таҳдид амалга ошса, АҚШ кучли жавоб олади"

Душанба куни Эрон олий раҳбари Оятулло Али Хоманаий агар Трампнинг таҳдидлари амалга ошса, АҚШ кучли жавоб олишини маълум қилди.

Хоманаийнинг сўзларига кўра, Эрон ва АҚШ ҳамда Исроил ўртасида доимо адоват мавжуд.

"Улар бизга ҳужум қилиш билан таҳдид қилмоқда, биз буни эҳтимолдан йироқ деб ҳисоблаймиз, аммо агар улар қандайдир ёвузлик қилса, улар, албатта, кучли жавоб олади", — деди Хоманаий Reuters агентлигига берган изоҳида.

"Агар улар илгари бўлганидек, мамлакат ичида исён уюштиришни режалаштираётган бўлса, Эрон халқининг ўзи улар билан ҳисоб-китоб қилади", — деб қўшимча қилди у.

Эрон ҳукумати Ғарбни мамлакатда тартибсизликлар ва норозилик намойишларини ташкил этишда айблайди. Булар қаторига 2022–2023 йиллардаги норозиликлар ҳам киради, улар Теҳрон томонидан аёлларнинг қатъий исломий кийиниш қоидаларига амал қилмагани учун бостирилган эди.

Ирон музокаралардан бош тортди

12 март куни, Трампнинг мактубини олгандан сўнг, Хоманаий унинг музокара ўтказиш таклифини "алдаш" деб атади.

Якшанба куни Associated Press (AP) агентлигининг хабар беришича, Эрон президенти Масъуд Пезешкиян Теҳроннинг АҚШ билан тўғридан-тўғри музокара ўтказиш таклифини рад этганини маълум қилди.

"Гарчи икки томон ўртасида тўғридан-тўғри музокаралар ўтказиш имконияти рад этилган бўлса-да, билвосита музокаралар учун йўл очиқлигича қолмоқда", — деди Эрон президенти.

Трамп Путиндан "жаҳли" чиққан бўлса-да, Россия АҚШ билан ишлашни давом этирмоқда

Россия президенти Доналд Трамп Владимир Путиндан "ғазабланиши" ва "жаҳли чиққани"га қарамасдан, Кремл АҚШ билан ҳамкорликни давом эттираётганини билдирди.

Россия президентининг матбуот котиби Дмитрий Песков "Биз, биринчи навбатда, икки томонлама муносабатларимизни қуриш бўйича АҚШ томони билан ишлашда давом этамиз", — деди душанба куни журналистларга берган баёнотида.

Унинг сўзларига кўра, бу ҳафта Путин ва Трамп ўртасида телефон суҳбати режалаштирилмаган, "лекин керак бўлса, Путин бундай қўнғироққа очиқ".

Трампнинг Путинга нисбатан аччиқланиши ва таҳдидлари

Кремлнинг вазиятни юмшатишга уриниши АҚШ президенти Доналд Трампнинг NBC News га берган интервюсида Путинга нисбатан қаттиқ сўзлар ишлатганидан сўнг юз берди.

Трамп Украина президенти Володимир Зеленскийга қарши танқидлар қилгани учун Путинга "жаҳли чиққанини" айтди.

Шунингдек, Трамп агар Путин Украинадаги оташкесим келишувига рози бўлмаса, Россия нефтини харид қилаётган давлатларга 50%лик тариф жорий қилиш билан таҳдид қилди.

Бу Россия президентига нисбатан оҳангнинг сезиларли ўзгаришини англатади.

АҚШ ва Россия расмийлари Украинадаги урушни тугатиш борасида келишувга эриши учун бир неча ҳафта музоркалар олиб борди. Бу вақт давомида Трамп Путиннни танқид қилмасдан, кўпинча Зеленскийни танқид қилди.

Аммо Трампнинг Путинга нисбатан ғазаби Россия президенти жудма куни Украинада БМТ кўмагида Зеленский ўрнини эгаллаши мумкин бўлган муваққат ҳукумат ғоясини илгари сургандан сўнг пайдо бўлди.

"Сиз, мени жуда аччиқланди, хафа бўлди, дейишингиз мумкин, чунки... Путин Зеленскийнинг обрўсига путур етказишга ўтди, бу эса тўғри эмас", — деди Трамп.

"Янги раҳбарият бўлиши, келишув узоқ вақтга кечикишини англатади", - дея қўшимча қилди у.

Россия матбуоти Трампни танқид қилмоқда

Россия президенти матбуот котиби Дмитрий Песков душанба кунги матбуот анжуманида Трампнинг NBC'га айтган сўзлари нотўғри талқин қилинганини даъво қилди.

Шу билан бирга, Россия матбуотида Трампга нисбатан камдан-кам учрайдиган танқидлар пайдо бўлди.

Кремлпараст нашр "Московский Комсомолец" Трампни танқид қилиб, "украин кучлари Россиянинг энергия инфратузилмасига ҳужум қилишини тўхтатиш мажбуриятларини бажармаяпти" деб ёзди.

"Президент Трамп даражасидаги барча келишувлар бозор кунида бир неча тангага арзийди", — деб ёзди газета. Шу билан бирга, "Москва АҚШ президенти билан келишувга тайёр" деб қўшимча қилди.