Sunday, 08 June, 2008, 11:40 GMT 16:40 PST

انگلینڈ ٹیسٹ سیریز میں فاتح

جیمز اینڈرسن اور رائن سائیڈ بوٹم کی تباہ کن بولنگ کی بدولت انگلینڈ نے نیوزی لینڈ کو تیسرے ٹیسٹ میچ میں ایک اننگز اور نو رن سے شکست دے کر تین میچوں کی سیریز دو صفر سے جیت لی ہے۔

ٹرینٹ برج سٹیڈیم میں کھیلے جانے والے اس میچ میں نیوزی لینڈ کو اننگز کی شکست سے بچنے کے لیے دو سو اکتالیس رنز درکار تھے لیکن اس کی پوری ٹیم میچ کے تیسرے دن دو سو بتیس رن بنا کر پویلین لوٹ گئی۔

نیوزی لینڈ کی دوسری اننگز میں برنڈن میکلم اور جیکب اورم نے نصف سنچریاں بنائیں۔ میکلم اکہتر جبکہ اورم پچاس رن بنا کر آؤٹ ہوئے۔ انگلینڈ کی جانب سے رائن سائیڈ بوٹم نے سڑسٹھ رن دے کر چھ وکٹیں حاصل کیں جبکہ جیمز اینڈرسن اور سٹیورٹ براڈ دو دو وکٹیں حاصل کر سکیں۔

جیمز اینڈرسن نے اس میچ میں کل نو وکٹیں حاصل کیں۔

انگلینڈ نے اس میچ میں اپنی پہلی اننگز میں کیون پیٹرسن کی عمدہ سنچری اور لوئر آرڈر کی ذمہ دارانہ بلے بازی کی بدولت تین سو چونسٹھ رن بنائے تھے۔

اس کے جواب میں نیوزی لینڈ کی ٹیم اپنی پہلی اننگز میں صرف ایک سو تئیس رن بنا سکی تھی اور اسے فالو آن پر مجبور ہونا پڑا تھا۔ نیوزی لینڈ کی پہلی اننگز میں انگلش بالر جیمز اینڈرسن نے صرف تنتالیس رن کے عوض سات کھلاڑیوں کو آؤٹ کیا تھا۔

یاد رہے کہ انگلینڈ نے دوسرے ٹیسٹ میچ میں نیوزی لینڈ کو چھ وکٹ سے شکست دے کر سیریز میں برتری حاصل کی تھی جبکہ لارڈز میں کھیلا جانے والا سیریز کا پہلا ٹیسٹ بے نتیجہ رہا تھا۔

اس برس مارچ میں بھی انگلینڈ نیوزی لینڈ کو ٹیسٹ سیریز میں شکست دے چکا ہے۔ نیوزی لینڈ میں کھیلی جانی والی اس سیریز میں انگلینڈ نے دو ایک سے فتح حاصل کی تھی۔