Tuesday, 27 November, 2007, 00:14 GMT 05:14 PST

عبدالرشید شکور
بی بی سی اردو ڈاٹ کام، کراچی

کمبلے اور ہربھجن کی کامیاب پارٹنرشپ

دہلی کا فیروز شاہ کوٹلہ گراؤنڈ انیل کمبلے کے لئے ہمیشہ یادگار رہا ہے۔ یہ وہی گراؤنڈ ہے جہاں انہوں نے آٹھ سال قبل پاکستان کے خلاف ٹیسٹ میچ میں اننگز کی دس کی دس وکٹیں حاصل کی تھیں۔

اور یہ گراؤنڈ ایک بار پھر انیل کملے کے لیے اچھا ثابت ہوا جب
بحیثیث کپتان نہ صرف اپنا پہلا ٹیسٹ جیتنے میں کامیاب رہے بلکہ اپنی انفرادی کارکردگی کی بدولت مین آف دی میچ ایوارڈ بھی ان کے نام رہا۔

انیل کمبلے فیروز شاہ کوٹلہ گراؤنڈ میں چھ ٹیسٹ میچز میں55 وکٹیں حاصل کرچکے ہیں جبکہ 119 ٹیسٹ میچ کھیل کر وہ 573 وکٹیں لے چکے ہیں جن میں سے بھارتی سر زمین پر ان کی حاصل کردہ وکٹوں کی تعداد332 ہوچکی ہے۔

حالیہ برسوں میں انیل کمبلے کو دوسرے اینڈ پر آف اسپنر ہربھجن سنگھ کا ساتھ حاصل رہا ہے۔’ بھجی‘ کے نام سے اپنے ساتھیوں میں مشہور ہربھجن سنگھ بھی کمبلے کی طرح بھارت کی متعدد کامیابیوں میں اہم کردار ادا کرتے رہے ہیں۔ 58ٹیسٹ میچوں میں ہربھجن سنگھ کی وکٹوں کی تعداد241 ہے جن میں سے165 وکٹیں انہوں نے اپنے ملک میں حاصل کی ہیں۔

انیل کمبلے کے سامنے اب شین وارن اور مرلی دھرن کی وکٹیں ہیں۔ بہت سے لوگوں کے خیال میں کمبلے کے لئے وہاں تک پہنچنا ناممکن نہیں تو مشکل ضرور ہے کیونکہ ملک سے باہر ان کی حاصل کردہ وکٹوں کی رفتار اتنی تیز نہیں۔

دوسری جانب بظاہر ریکارڈز سے بے نیاز ہربھجن سنگھ اپنی کرکٹ سے بھرپور لطف اٹھا رہے ہیں اور جہاں بھی انہیں موقع ملتا ہے وہ کسی سے پیچھے نہیں رہتے۔

پاکستان کے خلاف دہلی ٹیسٹ میں اگرچہ بھجی کی وکٹوں کی تعداد صرف تین رہی لیکن دوسری اننگز میں انہی کی حاصل کردہ محمد یوسف اور شعیب ملک کی وکٹوں نے پاکستان کے لئے میچ میں رہنے کی رہی سہی امید بھی ختم کردی۔