Tuesday, 07 August, 2007, 20:01 GMT 01:01 PST

ٹوئنٹی ٹوئنٹی دھونی کی قیادت میں

ٹوئنٹی ٹوئنٹی ورلڈ کپ کے لیے مہندر سنگھ دھونی کو بھارتیہ ٹیم کی کمان سونپی گئی ہے اوریووراج ٹیم کے نائب کپتان ہوں گے۔

دھواں دار بلے باز ویریندر سہواک ، آف سپنر ہر بھجن سنگھ اور تیزگیند باز اجیت اگرکر کی ٹیم میں واپسی ہوئی ہے۔منگل کو سلیکشن کمیٹی کی میٹنگ کے بعد ستمبر میں جنوبی افریقہ میں ہونے والے ٹوئنٹی ٹوئنٹی ورلڈ کپ کے لیے پندرہ رکنی ٹیم کا اعلان کیا گیا۔

راہل دراوڑ ، سوربھ گانگولی اور سچن تندولکر پہلے ہی اس مقابلے میں شامل نہ ہونے کا اعلان کرچکے ہیں۔ان کے علاوہ ظہیر خان بھی پہلے ہی سلیکشن کمیٹی کو اس ٹورنا منٹ میں نہ کھیلنے کے اپنے ارادے سے آگاہ کر چکے تھے اس لیے ان کا بھی انتخاب نہیں کیا گیا۔

ٹیم میں تیز بالرعرفان پٹھان اور ان کےبھائی یوسف پٹھان کو بھی جگہ ملی ہے۔ سلیکشن کمیٹی کے چیئرمین دلیپ وینگسرکر نےجو اس وقت ساؤتھ افریقہ کے دورے پر ہیں کمیٹی کے دوسرے ارکان سے ٹیلی فون پر رابطے کے ذریعے ٹیم کا انتخاب کیا ہے۔

ٹیم میں شامل کھلاڑیوں کے نام ہیں: مہندر سنگھ دھونی، یوراج سنگھ، رابن اتھپّا، ویریندر سہواگ، دنیش کارتک، روہت شرما،گوتم گمبھیر، یوسف پٹھان، رودر پرتاپ سنگھ، عرفان پٹھان، اجیت اگر کر، سنت کمارنشری سنت، جوگندر شرما، پیوش چاولہ اور ہر بھجن سنگھ۔