پاکستان ایشاء کپ کھیلے گا

پاکستان ہاکی فیڈریشن نے یوٹرن لیتے ہوئے اس سال یکم سے نو ستمبر تک چنائی میں ہونے والے ایشیا کپ ہاکی ٹورنامنٹ میں شرکت کا فیصلہ کر لیا ہے اور بھارتی ہاکی فیڈریشن کو اس فیصلے سے با ضابطہ طور پر آگاہ کر دیا گیا ہے۔

اس سے پہلے پاکستان ہاکی فیڈریشن نے اس کپ میں شرکت نہ کرنے کا فیصلہ کیا تھا جس پر سابق اولمپئن اورہاکی شائقین کی جانب سے ہاکی فیڈریشن پر سخت تنقید ہوئی تھی۔

پاکستان ہاکی فیڈریشن کے اعلان کے مطابق ٹیم کو ایشیا کپ میں بھیجنے کا اب فیصلہ کرنے کی وجہ یہ ہے کہ انٹرنیشنل ہاکی فیڈریشن نے انہیں آگاہ کیا ہے کہ ایشیا کپ ایک رینکنگ ٹورنامنٹ ہے۔

پاکستان کی ہاکی کی عالمی درجہ بندی میں پانچویں پوزیشن ہے اس سے پہلے جرمنی، آسٹریلیا، ہالینڈ اور سپین ہیں۔

پاکستان ہاکی فیڈریشن کے مطابق انہیں فوری پر یہ فیصلہ کرنا پڑا تا کہ اس ٹورنامنٹ میں شرکت نہ کر کے کہیں پاکستان کی ہاکی ٹیم کی عالمی درجہ بندی میں تنزلی نہ ہو جائے۔

پی ایچ ایف کے اس فیصلے پر سابق المپئنز نے شدید تنقید کی تھی اور کہا تھا کہ شکست کے خوف سے ٹورنامنٹ نہ کھیلنا درست فیصلہ نہیں اور جیت ہار کو ذہن سے نکال کر زیادہ سے زیادہ بین الاقوامی تجربہ دینا بھی کھلاڑیوں کے لیے ضروری ہے۔

پاکستان ہاکی فیڈریشن کے صدر میر ظفر اللہ جمالی نے فیڈریشن کے سیکریٹری خالد محمود کے ساتھ مشورہ کر کے ٹیم کو بھارت بھیجنے کا فیصلہ کیا ہے اور پی ایچ ایف کے مطابق انٹرنیشنل ہاکی فیڈریشن نے اس فیصلے کا خیر مقدم کیا ہے۔

اس سے پہلے ٹیم کو نہ بھیجنے کی وجہ پی ایچ ایف نے یہ بتائی ہے کہ ایشیا کپ میں بھیجنا ٹیم کے اہم ٹورنامنٹ کے لیے تیاری کے عمل کے لیے اچھا نہیں تھا لیکن اب یہ فیصلہ ایشیا کپ کے رینکنگ ٹورنامنٹ ہونے کے سبب تبدیل کرنا پڑا۔

پاکستان ہاکی فیڈریشن کا مؤقف تھا کہ اگر اس سال دسمبر میں ہونے والی چمپئنز ٹرافی سے پہلے کھلاڑی ایشا کپ میں اچھی کارکردگی نہ دکھا سکے تو ان کا مورال گر سکتا ہے اور اعتماد میں کم ہو سکتی ہے جبکہ نہ بھیجنے سے مالی بچت کا بھی کہا گیا تھا۔

اب پی ایچ ایف کے ایشیا کپ میں شرکت کے فیصلے کو سابق المپئنز نے خوش آئند قرار دیا ہے۔

لیگ کھیلنے والے سینیر کھلاڑیوں پر پہلے ہاکی کے دروازے بند کرنے اور پھر فٹنس کا ثبوت دے کر کسی بھی سینیر کھلاڑی کو ٹیم میں لینے کے اعلان کے بعد یہ دوسرا فیصلہ ہے جس پر پاکستان ہاکی فیڈریشن نے یو ٹرن لیا ہے۔