سارا اینٹیگا بِیس منٹ میں

دلکش موسم، گہرا نیلا سمندر، صاف شفاف پانی اور چاروں طرف چھوٹی چھوٹی سرسبز پہاڑیاں، اور آبادی اتنی کہ اس سے زیادہ لوگ کسی بھی وقت دلی یا کراچی کے ریلوے سٹشن پر دیکھ سکتے ہیں۔ اور وہ بھی اس وقت جب سٹیشن پر بھیڑ زیادہ نہ ہو۔

آپ ہوٹل سے نکلیں اور کہیں بھی جائیں ہرجگہ صرف بیس منٹ کے فاصلے پر ہے۔

ٹیکسی والے سے کہیں بھی چلنے کے لیے کہیں، جواب ایک ہی ہوتا ہے: ’ بیس منٹ کا راستہ ہے۔‘

کتنے پیسے ہوں گے؟ ’ بیس یو ایس‘ (یعنی بیس امریکی ڈالر)۔

ووین رچرڈز کے چوکے چھکے جاری

تو کیا حیرت کی بات ہے کہ ہوٹل پہنچنے کے صرف بیس منٹ کے اندر( یا اس سے ایک دو گھنٹے زیادہ میں) میری ملاقات ایک ہندوستانی نژاد ہندو لڑکے اور ایک پاکستانی نژاد مسلمان لڑکی سے ہوگئی۔ دونوں کے آبا و اجداد کو دوسرے ہزاروں لوگوں کی طرح یہاں کھیتوں میں کام کرنے کےلیے ہندوستان سے لایا گیا تھا۔ لڑکی کے والد کا تعلق برصغیر کے اس علاقے سے جو اب پاکستان میں ہے۔

ہندو لڑکا، مسلمان لڑکی۔ تو چاہے بات تقسیم ہند سے سو ڈیڑھ سو سال پرانی ہی کیوں نہ ہو دلچسپ ضرور ہے، ورنہ اس کہانی پر کئی فلمیں کیوں بنتیں۔

ریشما کے والد ہندو ہیں جبکہ ان کی والدہ بہت مذہبی ہیں، ہفتے میں دو مرتبہ مسجد جاتی ہیں، اور ’انہیں زیادہ خوشی ہوتی اگر میں مسلمان لڑکے سے شادی کرتی ۔۔۔

شوہر ران پرساد اپنے پرکھوں کی آتما کی شانتی کے لیے بدری ناتھ کیدار ناتھ کی یاترا کرنا چاہتے ہیں، لیکن بیوی کے مذہب سے انہیں کوئی لینا دینا نہیں۔

کہانی کافی فلمی ہے۔ تھوڑی اور بات اور کی تو معلوم ہوا کہ ریشما کےوالد نوبل انعام یافتہ مصنف وی ایس نائپال کے بھتیجے ہیں۔ تو پھرکہانی میں اتار چڑھاؤ تو آنے ہی تھے لیکن جہاں تک مجھے معلوم ہے خود وی ایس نائپال مسلمانوں یا اسلام سے زیادہ محبت نہیں کرتے۔
ہندو لڑکا، مسلمان لڑکی۔ بات دلچسپ ضرور ہے، ورنہ اس کہانی پر کئی فلمیں کیوں بنتیں؟

آسٹریلوی ٹیم کی نیٹ پریکٹس دیکھنے سٹیڈیم پہنچا تو معلوم ہوا کہ اینٹیگا کے تمام بڑے سابق کرکٹرز ’سینڈی ہیون بیچ‘ پر بین الاقوامی میڈیا کی ٹیم کے ساتھ ٹوئنٹی ٹوئنٹی کا میچ کھیل رہے ہیں۔

سر ووین رچرڈز، کورٹنی والش، رچی رچرڈسن سب موجود تھے اور جس طرح عام لوگوں کے ساتھ گھل مل رہے تھے، کوئی کہہ نہیں سکتا کہ اس ملک میں یہ لوگ آج بھی سپر اسٹارز ہیں۔

حیرت کی بات یہ ہے کہ اینٹیگا میں کوئی نہیں چاہتا کہ ورلڈ کپ ویسٹ انڈیز جیتے، یا کم سے کم ان لوگوں میں سے تو کوئی نہیں چاہتا تھا جن سے میری ملاقات ہوئی ہے۔ وجہ یہ ہے کہ ویسٹ انڈیز کی موجودہ ٹیم میں اینٹیگا کا ایک بھی کھلاڑی شامل نہیں ہے۔ موجودہ ’ٹیم پر ٹرینیڈاڈ، جمائکا اور گرینیڈا جیسے بڑے جزیروں کا غلبہ ہے۔‘

اور آخر میں آپکو یہ اور بتا دوں کہ اتوار کو جب آسٹریلیا اور انگلینڈ کے درمیان میچ ہوگا، تو پورے ملک کی تقریباً چوتھائی آبادی انیس ہزار کی گنجائش والے سٹیڈیم میں موجود ہوگی۔ میں سوچ رہا تھا کہ ہندوستان میں اگر چوتھائی آبادی کے لئے سٹیڈیم بنانا ہو تو کم سے کم تیس کروڑ لوگوں کے بیٹھنے کا انتظام کرناہوگا!!


	ہندو لڑکا، مسلمان لڑکی۔ بات دلچسپ ضرور ہے، ورنہ اس کہانی پر کئی فلمیں کیوں بنتیں؟