ورلڈ کپ کے لیے ڈوپ ٹیسٹ

پاکستان کرکٹ بورڈ ڈوپ ٹیسٹ کے لیے ورلڈ کپ سکواڈ کے کھلاڑیوں کے پیشاب کے نمونے حاصل کر رہا ہے جو ملائیشین لیبارٹری میں بھیجے جائیں گے۔

پاکستان کرکٹ بورڈ نے ورلڈ کپ سے قبل اپنے بیس کرکٹرز کے ڈوپ ٹیسٹ کرانے کا فیصلہ اس لیے کیا ہے تا کہ عالمی مقابلے میں انہی کھلاڑیوں کی شرکت کو یقینی بنایا جاسکے جو ممنوعہ ادویات کے استعمال کے ممکنہ خطرے سے دوچار نہ ہوں۔

اس طرح کے ڈوپ ٹیسٹ پاکستان کرکٹ بورڈ نے بھارت میں کھیلی گئی چیمپئنز ٹرافی سے قبل بھی کرائے تھے اور اس کے نتیجے میں اسے شعیب اختر اور محمد آصف کو ٹیم سے دستبردار کرانا پڑا تھا کیونکہ ان کے ڈوپ ٹیسٹ مثبت پائے گئے تھے۔

دانش کنیریا، محمد سمیع یونس خان اور محمد یوسف کے پیشاب کے نمونے ہفتے کو کراچی میں حاصل کیے گئے۔ جمعہ کو لاہور میں بارہ کرکٹرز اس عمل سے گزرے تھے۔ کپتان انضمام الحق اتوار کو اس عمل کے لیے پیش ہوں گے۔

شاہد آفریدی چیرٹی میچ اور محمد آصف کہنی کے علاج کے لیے ملک سے باہر ہیں اس لیے ان کے پیشاب کے نمونے ان کی وطن واپسی پر حاصل کیے جائیں گے۔

فاسٹ بولر شعیب اختر گھٹنے کی تکلیف کے بارے میں اپنے معالج سے مشورے کے بعد انگلینڈ سے وطن واپس پہنچے ہیں ان کے پیشاب کے نمونے بھی ابھی لیے جانے ہیں، لیکن وہ کب اس کے لیے خود کو پیش کریں گے یہ سوال بڑی اہمیت کا حامل ہے کیونکہ وہ علاج کے لیے دوبارہ انگلینڈ جا رہے ہیں۔

پاکستان کرکٹ بورڈ کے ترجمان کے مطابق تمام نمونے جلد ہی ملائیشیا میں واقع واڈا کی سند یافتہ لیبارٹری میں بھیجے جائیں گے۔