ندیم سعید
بی بی سی اردو ڈاٹ کام، لندن
یوسف: ریکارڈوں کی ہیٹ ٹرک
کراچی میں جاری پاکستان اور ویسٹ انڈیز کے درمیان سیریز کے تیسرے ٹیسٹ میچ میں سنچری بنا کر محمد یوسف نے ایک سال میں سب سے زیادہ بنانے کا ریکارڈ قائم کر دیا ہے۔
انہوں نے 1711 رنز بنا کر ویو رچرڈز کا ریکارڈ توڑا۔ اس کے ساتھ ہی انہوں نے رواں سال میں نویں سینچری بنا کر ایک سال میں سب سے زیادہ سینچریاں بنانے کا نیا ریکارڈ قائم کیا۔
کراچی ٹیسٹ میں بنائی گئی سنچری محمد یوسف کی مسلسل چھٹی سینچری ہے اور اس طرح انہوں نے کرکٹ کی دنیا کے عظیم بلے باز سر ڈان بریڈ مین کے چھ مسلسل سنچریاں بنانے کے ریکارڈ بھی برابر کر دیا ہے۔
اس سے پہلے ایک ’ کیلنڈر ائیر‘ میں سب سے زیادہ سنچریاں بنانے کا ریکارڈ مشترکہ طور پر کرکٹ کی تاریخ کے نامور بلے بازوں ویسٹ انڈیز کے ویو رچرڈز اور سری لنکا کے اروندا ڈی سلوا کے پاس تھا۔ دونوں نے ایک سال میں سات، سات سنچریاں بنا رکھی تھیں۔
میچ کی تازہ صورتحال جاننے کے لیے کلک کریںکراچی میں کھیلا جانے والا ٹیسٹ بتیس سالہ محمد یوسف کے کریئر کا تہترواں میچ ہے۔ اس سے قبل بہتر ٹیسٹ میچز میں تقریباً چھپن رنز فی اننگز کی اوسط سے کھیلتے ہوئے انہوں نے اکیس سنچریوں اور چھبیس نصف سنچریوں کی مدد سے چھ ہزار ایک چھہتر رنز بنائے رکھے تھے۔