Sunday, 02 July, 2006, 10:37 GMT 15:37 PST

ڈیوڈ بیکھم نے کپتانی چھوڑ دی

فٹبال عالمی کپ کے کوارٹر فائنل میں پرتگال کے ہاتھوں شکست کے بعد برطانوی ٹیم کے کپتان ڈیوڈ بیکھم نے اپنا عہدہ چھوڑنے کا اعلان کیا ہے۔

اکتیس سالہ بیکھم چھ برس تک برطانوی فٹبال ٹیم کے کپتان رہے۔

انگلینڈ بمقابلہ پرتگال

جرمنی میں انگلش ٹیم کی اختتامی پریس کانفرنس میں بیکھم نے کہا کہ’ مجھے لگ رہا ہے کہ یہ صحیح وقت ہے کہ میں کپتانی کی ذمہ داری چھوڑ دوں کیونکہ ہم ایک نئے کوچ کے ہمراہ ایک نئے دور میں داخل ہو رہے ہیں‘۔

تاہم بیکھم کا کہنا تھا کہ وہ انگلینڈ کی جانب سے بطور کھلاڑی اپنا کردار ادا کرتے رہنا چاہتے ہیں۔انہوں نے کہا کہ’ قومی ٹیم کی کپتانی میرے لیئے ایک اعزاز اور فخر کی بات رہی ہے اور میں اب انگلینڈ کے لیئے کھیلنا چاہتا ہوں اور نئے کپتان اور نئے کوچ سٹیو مکلارن کی مدد کرنا چاہتا ہوں‘۔

ڈیوڈ بیکھم کو سنہ 2000 میں اس وقت کے نگران مینجر پیٹر ٹیلر نے کپتان مقرر کیا تھا۔ پریس کانفرنس میں آبدیدہ بیکھم کا کہنا تھا کہ’ پندرہ نومبر سنہ 2000 کو پیٹر ٹیلر نے انگلش فٹبال ٹیم کا کپتان بنا کر مجھے میری زندگی کا سب سے بڑا اعزاز دیا تھا اور میرے بچپن کا خواب پورا کر دیا تھا‘۔

یاد رہے کہ پرتگال کے خلاف میچ کے باونویں منٹ میں ڈیوڈ بیکھم زخمی ہونے کی وجہ سے میدان سے باہر چلے گئے تھے۔