مزید3 سال کھیلوں گا، مرلی دھرن

بین الاقوامی کرکٹ میں ہزار وکٹوں کی تکمیل کے باوجود متایا مرلی دھرن مطمئن نہیں ہوئے اور مزید تین سال کرکٹ کھیل کر اپنے شکاروں کی تعداد میں غیرمعمولی اضافے کے لیے پرعزم ہیں۔

مرلی 2007 میں ریٹائر ہو نگے

کولمبو کے پی ساراوانا موتو سٹیڈیم میں تامل کرکٹ یونین نے انٹرنیشنل کرکٹ میں ہزار وکٹیں حاصل کرنے پر اپنے تامل ہیرو کے اعزاز میں خصوصی تقریب کا اہتمام کیا جس میں انہیں روایتی جوش وخروش کے ساتھ خراج تحسین پیش کیا گیا۔

اس تقریب میں مرلی دھرن نے بی بی سی سے بات کرتے ہوئے کہا کہ وہ پندرہ سالہ کریئر پر خوش ہیں کہ کئی ریکارڈز اور کئی سنگ میل ان کے نام ہوئے وہ سمجھتے ہیں کہ انہوں نے جو کچھ سوچا تھا وہ کر دکھایا۔ یہ ایک شاندار کریئر رہا ہے۔

33سالہ مرلی دھرن کا کہنا ہے کہ وہ ورلڈ کپ تک کسی دشواری کے بغیر کھیل سکتے ہیں اس کے بعد دیکھیں گے کہ کیا کرنا ہے لیکن جہاں تک ان کی کرکٹ کا تعلق ہے تو وہ چھتیس سنتیس سال کی عمر تک کھیل سکتے ہیں اور موجودہ کارکردگی کو برقرار رکھنے کی صورت میں وہ مزید بھی کچھ کر سکتے ہیں جس کے لیے وہ محنت جاری رکھیں گے۔

مرلی دھرن103 ٹیسٹ میچوں میں611 وکٹیں حاصل کرچکے ہیں اور وہ شین وارن کی674 وکٹوں کے عالمی ریکارڈ سے63 وکٹوں کے فاصلے پر ہیں اسی طرح273 ون ڈے انٹرنیشنل میں ان کی حاصل کردہ وکٹوں کی تعداد414 ہے اور وسیم اکرم کی502 وکٹوں کا عالمی ریکارڈ بھی ان کی دسترس میں ہے لیکن خود مرلی کو ریکارڈز کی قطعاً پروا نہیں ہے۔ان کا کہنا ہے کہ وہ اپنی کرکٹ پر توجہ مرکوز کیے ہوئے ہیں وہ اچھی کارکردگی کے ساتھ تین چار سال کرکٹ کھیلیں گے تو پھر اندازہ ہوسکے گا کہ یہ ریکارڈز ان کے نام ہوتے ہیں یا نہیں ؟ اور اگر وہ ان ریکارڈز کو حاصل کرنے میں کامیاب ہو گئے تو اس دنیا میں ان سے زیادہ خوش قسمت شخص کوئی اور نہیں ہوگا۔

مرلی کتنے دور کتنے قریب؟

مرلی دھرن کارکردگی سے زیادہ اپنے بولنگ ایکشن کی وجہ سے موضوع بحث رہے ہیں۔ اس بارے میں مرلی دھرن کا کہنا ہے کہ وہ یہ ثابت کرچکے ہیں کہ وہ بے قصور ہیں اور انہوں نے کوئی غلط کام نہیں کیا۔ وہ اس صورتحال سے کبھی نہیں گھبرائے۔ اس ضمن میں وہ اپنے ساتھی کرکٹرز کرکٹ بورڈ اور پرستاروں کو نہیں بھول سکتے جنہوں نے مشکل گھڑی میں ان کا حوصلہ بلند کیا۔ لوگ ان کے بولنگ ایکشن کے بارے میں کچھ بھی کہتے رہیں وہ اپنا سفر جاری رکھیں گے۔

مرلی دھرن کی پرفریب گیندوں کے علاوہ ان کی چمکتی آنکھیں بھی بیٹسمینوں کو اپنے سحر میں مبتلا کردیتی ہیں اس بارے میں کیے گئے سوال پر مرلی دھرن نے قہقہہ لگاتے ہوئے کہا کہ انہیں نہیں معلوم۔ شاید اس لیے بھی لوگ اس جانب متوجہ ہوتے ہوں کہ ان کی آنکھیں بڑی ہیں۔

مرلی دھرن اپنے کپتانوں میں سب سے زیادہ ارجنا راناتنگا کی قائدانہ صلاحیتوں کے معترف ہیں۔

ان کا کہنا ہے کہ جن کپتانوں کے ساتھ وہ کھیلے ہیں ان میں رانا تنگا بہترین تھے کیونکہ جب ان کے بولنگ ایکشن پر اعتراض ہوا تو راناتنگا نے ان کے لیے زبردست آواز بلند کی اور ان کی حمایت کی۔ سری لنکا نے ورلڈ کپ بھی ان کی کپتانی میں جیتا اور کئی بڑی کامیابیاں حاصل کیں۔

کس بیٹسمین کو آؤٹ کرکے زیادہ خوشی ہوئی؟ مرلی دھرن اس سوال پر پہلے تو کہنے لگے کہ ہر اچھے بیٹسمین کو آؤٹ کر کے خوشی ہوتی ہے لیکن پھر ماضی میں کھو کر بولے میں نیوزی لینڈ کے مارٹن کرو کو جس گیند پر آؤٹ کیا تھا وہ لاجواب گیند تھی۔

مرلی کی لاجواب گیند؟

ہر اچھے بیٹسمین کو آؤٹ کرکے خوشی ہوتی ہے لیکن نیوزی لینڈ کے مارٹن کرو کو جس گیند پر آؤٹ کیا تھا وہ لاجواب گیند تھی

مرلی دھرن ڈھائی ماہ کے بچے کے باپ بھی ہیں تو کیا ایک اور مرلی دھرن دنیا میں آچکا ہے؟ مرلی کا جواب ہے اس مرحلے پر کچھ کہنا ممکن نہیں اگر وہ کرکٹ میں اپنا مستقبل بہتر سمجھے گا تو اسے نہیں روکیں گے یوں بھی کرکٹ سری لنکنز میں رچی بسی ہے۔