Sunday, 18 December, 2005, 08:56 GMT 13:56 PST

آسٹریلیا مضبوط پوزیشن میں

پرتھ میں ہونے والے پہلے ٹیسٹ میچ میں آسٹریلیا کو جنوبی افریقہ پر دو سو بہتر رن کی برتری حاصل ہو گئی ہے۔

تیسرے دن کے کھیل کے اختتام پر آسٹریلیا نے 310 رن بنائے اور اس کے چار کھلاڑی آؤٹ ہوئے ہیں۔

تفصیلی سکور کارڈ

آسٹریلیا کی جانب سے مائیکل ہسی، بریڈ ہوج اور رکی پونٹنگ نے نصف سنچریاں سکور کیں۔ رکی پونٹنگ 53 رن بنا کر آٰؤٹ ہوئے جبکہ ہسی اور بریڈ ہوج تاحال کریز پر موجود ہیں۔

تیسرے دن آسٹریلیا کے آؤٹ ہونے کھلاڑیوں میں نائٹ واچ مین بریٹ لی، کپتان رکی پونٹنگ اور اوپنر جسٹن لینگر شامل تھے جبکہ میتھیو ہیڈن گزشتہ روز آؤٹ ہوئے تھے۔

آسٹریلیا نے تیسرے دن کھیل کا آغاز اڑتیس رن ایک کھلاڑی آؤٹ پر کیا اور اس کی دوسری وکٹ چھیاسی کے سکور پر گری جب نائٹ واچ مین بریٹ لی 32 رن بنا کر ایل بی ڈبلیو ہو گئے۔ بریٹ لی کے بعد رکی پونٹنگ اور جسٹن لینگر نے پراعتماد انداز سے بیٹنگ کی اور ٹیم کے سکور کو 129 تک لے گئے۔ اس موقع پر جسٹن لینگر 47 رن بنا کر شان پولاک کی گیند پر بولڈ ہو گئے۔ رکی پونٹنگ کو 53 کے انفرادی سکور پر نٹنی کی گیند پر باؤچر نے کیچ کیا۔

جنوبی افریقہ کی جانب سے لینگی ولٹ نے دو جبکہ پولاک اور نٹنی نے ایک، ایک وکٹ حاصل کی۔

اس سےقبل میچ کے دوسرے دن جنوبی افریقہ کی ٹیم آسٹریلیا کے پہلی اننگز کے 258 رنز کے جواب میں 296 رن بنا کر آؤٹ ہوگئی تھی۔ جنوبی افریقہ کی جانب سے ڈی ویلیئرز 68 اور وکٹ کیپر مارک باؤچر 62 رن بنا کر نمایاں رہے۔

آسٹریلیا کی جانب سے بریٹ لی نے پانچ، شین وارن نے تین جبکہ میگراتھ اور ناتھن بریکن نے ایک ایک وکٹ حاصل کی۔

آسٹریلوی بالر شین وارن کے لیے یہ اننگز انتہائی اہمیت کی حامل تھی کیونکہ جب اس اننگز کے دوران جب انہوں نے اپنی تیسری وکٹ حاصل کی تو وہ آسٹریلیا کی جانب سے ٹیسٹ کرکٹ میں ایک سال کے دوران سب سے زیادہ وکٹ لینے والے بالر بن گئے۔ یہ اس برس ان کی چھیاسیویں وکٹ تھی اور انہوں نے ڈینس للی کا ایک برس میں ٹیسٹ میچوں میں پچاسی وکٹ لینے کا ریکارڈ توڑا۔