Sunday, 04 December, 2005, 11:40 GMT 16:40 PST

پاکستانی ٹیم چوتھے نمبر پر آگئی

پاکستانی کرکٹ ٹیم کی انگلینڈ کے خلاف ٹیسٹ سیریز میں دو صفر سے کامیابی کے بعد آئی سی سی چیمپین شپ ٹیبل میں پوزیشن تین درجے بہتر ہو گئی ہے۔

پاکستان اب ٹیسٹ کرکٹ میں آئی سی سی کی درجہ بندی میں چوتھے نمبر پر ہے اور جنوبی افریقہ، سری لنکا اور نیوزی لینڈ سے آگے ہے۔ پاکستان اب بھارت سے نو پوائنٹ پیچھے ہے جو آئندہ سال فروری میں اس کا مد مقابل ہوگا۔

درجہ بندی میں آسٹریلیا ایک سو اٹھائیس پوائنٹ کے ساتھ پہلے اور انگلینڈ ایک سو تیرہ پوائنٹ کے ساتھ دوسرے نمبر پرہے۔ درجہ بندی میں انگلینڈ کی پوزیشن کو پاکستان کے ہاتھوں شکست کے بعد فرق نہیں پڑا لیکن اس کے چھ پوائنٹ کم ہو گئے ہیں۔

پاکستان کی یہ دسمبر دو ہزار تین کے بعد ٹیسٹ سیریز میں پہلی کامیابی ہے۔ انگلینڈ کے خلاف اچھی کارکردگی کی وجہ سے انضمام الحق، محمد یوسف اور شعیب اختر کی پوزیشن بھی بہتر ہوئی ہے۔

انضمام الحق بلے بازی کے شعبے میں آسٹریلوی کرکٹ ٹیم کے کپتان رکی پونٹنگ کے ساتھ تیسرے نمبر پر ہیں۔ جنوبی افریقہ کے ژاک کالس اور برائن لارا بالترتیب پہلے اور دوسرے نمبر پر ہیں۔

محمد یوسف بھی لاہور ٹیسٹ میں ڈبل سنچری کی بدولت پہلے دس بلے بازوں میں آ گئے ہیں۔ وہ نویں پوزیشن پر ہیں۔

شعیب اختر بالروں میں چوتھے نمبر پر ہیں۔ انہوں نے اپنی پوزیشن تین درجے بہتر کی ہے۔ دانش کنیریا پندرھویں سے تیرھویں پوزیشن پر چلے گئے ہیں۔

پاکستان کے خلاف ٹیسٹ سیریز کے بعد اینڈریو فلنٹاف دنیا کے بہترین
آل راؤنڈر نہیں رہے جو اب ژاک کالس کا اعزاز ہے۔ فلنٹاف اب بھی ایک روزہ مقابلوں میں بہترین آل راؤنڈر ہیں۔

پہلی دس پوزیشنوں میں انگلینڈ کے واحد کھلاڑی مارکس ٹریسکوتھک ہیں جو آٹھویں نمبر پر ہیں۔ میتھیو ہوگارڈ کی دو پوزیشنیں کم ہوئی ہیں اور اب وہ بالروں میں بارھویں نمبر پر ہیں۔ سٹیفن ہارمیسن بھی دو پوزیشنیں نیچے آنے کے بعد پندرھویں نمبر پر آ گئے ہیں۔

پاکستان کے وکٹ کیپر کامران اکمل اٹھائیس پوزیشنیں بہتر کرتے ہوئے باسٹھویں نمبر پر پہنچے ہیں۔