Monday, 21 November, 2005, 06:13 GMT 11:13 PST
میچ کا دوسرا دن پاکستان کے نام
فیصل آباد ٹیسٹ کے دوسرے دن کے کھیل کے اختتام پر انگلینڈ نے اپنی پہلی اننگز میں تین وکٹ کے نقصان پر ایک سو تیرہ رن بنا لیے۔
انگلینڈ کے آؤٹ ہونے والے آخری کھلاڑی ٹریسکوتھک تھے جو اڑتالیس رن بنا کر محمد سمیع کی گیند پر آؤٹ ہوئے۔ جب کھیل ختم ہوا تو این بیل چھتیس رن پر جبکہ کیون پیٹرسن چار رن پر کھیل رہے تھے۔
تفصیلی سکور کارڈچائے کے وقفے کے بعد کھیل اس وقت کچھ دیر کے لیے رکا رہا جب میدان میں ایک زوردار دھماکے کی آواز سنائی دی۔ یہ دھماکہ گیس کے ایک سلنڈر کے پھٹنے سے ہوا۔
انگلینڈ کی جانب سے مارکس ٹریسکوتھک اور اینڈریو سٹراس نے محتاط طریقے سے اننگز کا آغاز کیا تاہم سٹراس بارہ رن بنا کر رانا نوید الحسن کی گیند پر بولڈ ہو گئے۔ اس وقت انگلینڈ کا مجموعی سکور تینتیس رن تھا۔ کپتان مائیکل وان بھی صرف دو رن بنا سکے۔ انہیں رانا نوید نے ہی بولڈ کیا۔
اس سےقبل پاکستانی ٹیم اپنی پہلی اننگز میں کھانے کے وقفے کے فوراً بعد چار سو باسٹھ رن بنا کر آؤٹ ہو گئی۔پاکستان کے آؤٹ ہونے والے آخری کھلاڑی شعیب اختر تھے جو بارہ رن بنا کر ہارمیسن کا تیسرا شکار بنے۔ دانش کنیریا چار کے انفرادی سکور پر ناٹ آؤٹ رہے۔
کھانے کے وقفے کے بعد جب میچ سروع ہوا تو کامران اکمل جائلز کی پہلی ہی گیند پر وکٹوں کے پیچھے کیچ ہو گئے۔ انہوں نے اکتالیس رن بنائے۔ محمد سمیع بھی اٹھارہ رن بنا کر جائلز کا شکار بنے۔ رانا نوید الحسن کو پچیس رن پر ہارمیسن نے بولڈ کیا۔
کپتان انضمام الحق نے اپنے کیریئر کی تیئیسویں سنچری سکور کی اور جاوید میانداد کے ہمراہ پاکستان کے لیے سب سے زیادہ ٹیسٹ سنچریاں بنانے والے بلے باز بن گئے۔ وہ ایک سو نو رنز بنا کر سٹیو ہارمیسن کے ایک تھرو سے بچنے کی کوشش میں رن آؤٹ ہوئے۔
اس سے قبل شاہد آفریدی پچاسی گیندوں پر چھ چھکوں اور چھ چوکوں کی مدد سے بانوے رنز بنا کر ہوگرڈ کی گیند پر ٹریسکوتھک کے ہاتھوں کیچ ہوئے۔ انضمام اور آفریدی نے پانچویں وکٹ کی شراکت میں ایک سو پنتالیس رن بنائے۔
انگلینڈ کی جانب سے ہارمیسن نے تین، جائلز اور ہوگرڈ نے دو ، دو جبکہ فلنٹوف، جائلز اور این بیل نے ایک، ایک وکٹ حاصل کی۔
میچ کے پہلے دن کھیل کے اختتام پر پاکستان نے چار وکٹوں کے نقصان پر 300 رنز بنائے تھے۔
پاکستان نے پہلے ٹیسٹ کے بعد ٹیم میں دو تبدیلیاں کیں۔ شبیر احمد کی جگہ رانا نوید الحسن کو اور حسن رضا کی شاہد آفریدی کو ٹیم میں شامل کیا گیا ہے۔ جبکہ انگلینڈ کے لیے کپتان مائیکل وان کی ٹیم میں واپسی ہوئی ہے۔
پاکستان کو اس سیریز میں ایک ۔ صفر کی برتری حاصل ہے۔ تین میچوں کی سیریز کا آخری ٹیسٹ میچ لاہور میں کھیلا جائے گا۔
پاکستان کی ٹیم
انضمام الحق، سلمان بٹ، شعیب ملک، محمد یوسف، یونس خان، دانش کنیریا، محمد سمیع، شعیب اختر، کامران اکمل، رانا نوید الحسن اور شاہد آفریدی۔
انگلینڈ کی ٹیم
مائیکل وان، مارکس ٹریسکوتھک، این بیل، اینڈریو سٹراس، اینڈریو فلنٹاف، کیون پیٹرسن، ایشلے جائلز، گرائنٹ جونز، سٹیو ہارمیسن، میتھیو ہوگارڈ اور شان اڈل۔