Tuesday, 23 August, 2005, 10:49 GMT 15:49 PST

گول ہاتھ سے ہی کیا تھا: میراڈونا

ارجنٹائن کے مشہور فٹبالر ڈیگو میراڈونا نے پہلی مرتبہ اعتراف کیا ہے کہ انہوں نے جان بوجھ کر ہاتھ کی مدد سے وہ گول کیا تھا جس کی بدولت سنہ انیس سو چھیاسی کے عالمی کپ میں ارجنٹائن نے انگلستان کو شکست دی تھی۔

یہ پہلا موقع ہے کہ میرا ڈونا نے اس مخصوص گول کے بارے میں عوامی طور پر کوئی بات کی ہو۔ ان کے اس گول کو ’ہینڈ آف گاڈ‘ یا دستِ خدائی کہا جاتا ہے۔

اپنے ٹی وی شو پر بات کرتے ہوئے میرا ڈونا کا کہنا تھا کہ انہوں نے فٹبال پر ہاتھ مارنے کا فیصلہ اس لیے کیا تھا کیونکہ برطانوی گول کیپر پیٹر شلٹن بہت طویل قامت تھے۔

میرا ڈونا نے بتایا کہ انہیں نہیں لگتا تھا کہ وہ گول کیپر کے اوپر سے اپنے سر کے ذریعے گیند گول میں پہنچا سکتے ہیں۔

میرا ڈونا نے حال ہی میں ارجنٹائن کے ٹی وی پر ایک ٹاک شو کی میزبانی سنبھالی ہے اور ان کا یہ پروگرام ابتداء سے ہی ملک کے مقبول ترین پروگراموں میں شامل ہو گیا ہے۔