Friday, 04 March, 2005, 08:14 GMT 13:14 PST

بولرز پریکٹس سے محروم رہے

پاکستان اور بھارت کے درمیان دھرم شالہ میں کھیلا جا رہا پریکٹس میچ دوسرے دن بھی خراب موسم کی نظر رہا اور اس طرح ٹیسٹ میچ سے قبل اپنے واحد میچ میں پاکستانی بولرز بولنگ کی پریکٹس نہ کر سکے۔

دوسرے دن کا آدھے سے زیادہ کھیل خراب موسم کی وجہ سے نہ ہو سکا اور آخر کار کم روشنی کی وجہ سے میچ روکنا پڑا۔

جس وقت کھیل رکا تو بھارت کی بورڈ پدیزیڈینٹ الیون نے پاکستان کے دو سو تہتر رنز کے جواب میں بائیس اوورز میں ایک وکٹ کے نقصان پر اکانوے رن بنائے تھے۔

محمد کیف بیالیس جبکہ جادھو تیس رنز پر کھیل رہے ہیں۔بھارت کے آؤٹ ہونے والے کھلاڑی ایس ایس پاراب تھے جنہیں رانا نوید الحسن نے آؤٹ کیا۔

اس سے قبل پاکستان کی کرکٹ ٹیم پہلے دن کے سکور ایک سو پینسٹھ رنز میں ایک سو آٹھ رن کا اضافہ کر کے آؤٹ ہو گئی۔ پاکستان کی جانب سے عبدالرزاق نے عمدہ بیٹنگ کا مظاہرہ کیا۔ انہوں نے دس چوکوں اور دو چھکوں کی مدد سے تریسٹھ رن بنائے۔

پاکستان کے بیٹسمین عاصم کمال کھیل شروع ہونے کے بعد دوسرے ہی اوور میں تنتالیس رنز بنا کر آؤٹ ہو گئے۔

بورڈ پریزیڈنٹ الیون کی جانب سے وینیو گوپال نے 48 رنز دے کر تین جبکہ پال اور گگن دیپ شنگھ نے دو دو وکٹیں حاصل کیں۔

پاکستان کی طرف سے نوید الحسن اور محمد سمیع نے بولنگ کا آغاز کیا۔ نوید نے اپنے دوسرے ہی اوور میں ستیاجیت پاراب کو گیارہ رنز پر بولڈ کر دیا۔

اس کے بعد کیف اور جادھو نے محتاط انداز سے کھیلتے ہوئے سکور کو آگے بڑھانا شروع کر دیا۔ کیف نے محمد سمیع کے ایک اوور میں لگاتار دو چوکے لگائے اور اس کے بعد جب رزاق بولنگ کے لیے آئے تو انہیں بھی کیف کی طرف سے دو جارحانہ چوکوں کا سامنا کرنا پڑا۔

واضح رہے کہ آٹھ مارچ کو موہالی میں ہونے والے ٹیسٹ میں کیف نہیں کھیل رہے ہیں۔