Thursday, 02 December, 2004, 12:50 GMT 17:50 PST

کپیل دیو کا ریکارڈ برابر

اسپن بولر انیل کمبلے نے بھارت کی جانب سے ٹیسٹ میچوں میں سب سے زیادہ وکٹیں لینے کا کپیل دیو کا ریکارڈ برابر کر دیا ہے۔

انھوں نے آج جنوبی افریقہ کے نتنی کو آوٹ کر کے ٹیسٹ میچوں میں اپنی چار سو چونتیسویں وکٹ حاصل کی۔ سابق بھارتی فاسٹ بالر کپیل دیو نے بھی اتنی ہی وکٹیں ایک سو اکتیس ٹیسٹ میچوں میں حاصل کی تھیں۔ تاھم انیل کمبلے نے یہ وکٹیں نوے ٹیسٹ میچوں میں لیں ہیں۔

بھارت نے جنوبی افریقہ کو کلکتہ میں کھیلے گئے اس دوسرے میچ میں ہرا کر دو ٹیسٹ میچوں کی سیریز جیت لی ہے۔ اس سے پہلے کان پور میں کھیلا گیا ٹیسٹ میچ بغیر کسی فیصلے کے ختم ہو گیا تھا۔

انیل کمبلے نے چودہ برس قبل انٹرنیشنل کرکٹ میں اپنے کیریر کا آغاز کیا۔ چودہ برس قبل انیس سالہ کمبلے نے اپنے کیریر کا پہلا اوور کرایا جس میں انہوں نے انگلینڈ کے ایلن لیمب کو آوٹ کیا۔

کمبلے جبڑے کی ہڈی ٹوٹنے کے باوجود کھیلتے رہے

کمبلے نے سوویں وکٹ اپنے اکیسویں ٹیسٹ میچ میں حاصل کی۔ دو سوویں وکٹ سینتالیسویں میچ میں ، تین سوویں وکٹ چھیاسٹھویں میچ میں اور چار سوویں وکٹ اس وقت حاصل کی جب وہ اپنا پچاسیواں میچ کھیل رہے تھے۔

سن دو ہزار میں کندھے میں چوٹ لگنے کی وجہ سے ان کا کیریر خطرے میں پڑ گیا تھا اور یہ سمجھا جا رہا تھا کہ وہ مذید نہیں کھیل سکیں گے ۔ تاھم بیس مہینے انٹرنیشنل کرکٹ سے باہر رہنے کے بعد وہ بھر پور طریقے سے واپس آئے ۔

کمبلے نے انیس سو ننانوے میں دہلی میں کھیلے گئے ٹیسٹ میچ میں
پاکستان کے خلاف ایک انگز میں پوری دس وکٹیں حاصل کیں تھیں۔ اس طرح وہ دنیا کے دوسرے بالر ہیں جنھوں نے ایک انگز میں دس وکٹیں حاصل کیں۔ ان سے پہلے انگلینڈ کے جم لیکر واحد بولر تھے جنھوں نے یہ کارنامہ انجام دیا تھا ۔