سکواش :بھارتی ٹاپ سیڈ کو شکست

تیرہویں ورلڈ جونیئر سکواش چیمپین شپ میں پاکستان کے باسط اشفاق نے ٹاپ سیڈ بھارت کے سوروگھوسل کو ہراکرسب کوچونکادیا ہے کیونکہ بھارتی کھلاڑی اسوقت برٹش اوپن جونیئر چیمپئن بھی ہیں جس کی وجہ سے انہیں عالمی جونیئر مقابلے کی درجہ بندی میں بھی سرفہرست رکھاگیا تھا۔

اسلام آباد کے مصحف علی میر اسکواش کمپلیکس میں جاری ورلڈ جونیئرچیمپین شپ میں پاکستان کے نوجوان کھلاڑیوں کے عمدہ کھیل نے اٹھارہ سال کے طویل انتظار کے بعد عالمی جونیئر سکواش کا انفرادی اعزاز ایک بار پھرجیتنے کی امیدوں کو روشن کردیاہے۔

1986 میں جان شیر ورلڈ جونیئر اسکواش چیمپئن شپ کا انفرادی اعزاز جیتنے والے آخری پاکستانی تھے۔ٹیم ٹائٹل اس وقت پاکستان کے پاس ہے۔ اس نے دسمبر2002ء میں انگلینڈ کو ہراکر یہ اعزاز حاصل کیا تھا۔

اس مرتبہ کوارٹرفائنل میں پہنچنے والے آٹھ میں سے چھ کھلاڑی پاکستانی ہیں ان میں باسط اشفاق کی کارکردگی اس لحاظ سے شاندار رہی کہ انہوں نے ٹاپ سیڈ اور برٹش اوپن جونیئرچیمپئن بھارت کے سوروگھوسل کو چار گیمز کے سخت مقابلے کے بعد شکست دیدی۔

کوارٹرفائنل میں وہ ہم وطن عامراطلس سے مقابلہ کریں گے جنہوں نے جرمنی کے جن شور کو ہرایا۔ نمبر دو سیڈ خالد اطلس نے کینڈا کے رابن کلارک کے خلاف کامیابی حاصل کی کواٹر فائنل میں ان کے حریف پاکستان ہی کے شاہنواز ہونگے

یاسر بٹ نے جرمنی کے سائمن ریزنر کو ہرایااب وہ مصر کے محمد عادل سے کھیلیں گے جبکہ فرحان محبوب نے امریکہ کے کرسٹوفر گورڈن کو زیر کیا کوارٹرفائنل میں ان کے مدمقابل مصر کے رامی آشور ہونگے۔