Sunday, 09 May, 2004, 11:38 GMT 16:38 PST

راشد: برطانیہ میں کرکٹ اکیڈمیاں

پاکستان کرکٹ ٹیم کے سابق کپتان راشد لطیف برطانیہ میں تین اکیڈمیوں کی تشکیل میں اہم کردار ادا کریں گے جن کا مقصد متوسط طبقے کے ایشیائی گھرانوں کے نوجوانوں کو کرکٹ کی تربیت دیں گے۔

راشد لطیف دو ہزار سے کراچی میں ایک اکیڈمی چلا رہے ہیں۔ برطانیہ میں ایشیائی کرکٹ کے منتظمین نے راشد سے کہا ہے کہ وہ لندن، لوٹن اور برمنگھم میں ایسی ہی اکیڈمیاں تشکیل دینے میں ان کی مدد کریں۔

پینتیس سالہ راشد لطیف نے بی بی سی کو بتایا ہے کہ ’میں نے گزشتہ ہفتے برطانیہ کا دورہ کیا اور ایشیئن کرکٹ کے لیڈران سے ملاقات کی جن کی یہ خواہش تھی کہ برطانوی نوجوانوں کی تربیت اور مدد کے لئے بھی ایسی ہی اکیڈمیاں بنائی جائیں‘۔

اگرچہ ان اکیڈمیوں کی اولین ترجیح برطانوی ایشیئن نوجوان ہوں گے لیکن یہاں ان تمام نوجوانوں کی مالی مدد بھی کی جائے گی جو دیگر اداروں میں کرکٹ کی تربیت حاصل کرنے کی استطاعت نہیں رکھتے۔

اِن نئی اکیڈمیوں میں آنے والوں سے کوئی فیس نہیں لی جائے گی البتہ انہیں مدد فراہم کرنے کے لئے مختلف کارپوریٹ اداروں اور حکومت پر انحصار کیا جائے گا۔

راشد لطیف نے بتایا کہ ’ہم لوگوں کی مدد کرنا چاہتے ہیں تاکہ غریب لوگ بھی کرکٹ کھیل سکیں۔ ہم برطانیہ کی مشہور کمپنیوں اور کھیلوں کے وزیر کے ساتھ مل کر کام کر رہے ہیں تاکہ اِنڈور اور آؤٹ ڈور مراکز کا حصول ممکن بنایا جا سکے‘۔