Saturday, 02 June, 2007, 11:54 GMT 16:54 PST

بند شریانوں کے لیے نیا علاج

سائنسدان بند شریانوں کے کھولنے سے خون جمنے کے امکانات کو ختم کرنے کا طریقہ تلاش کر رہے ہیں۔ چھوٹی چھوٹی ٹیوبیں جنہیں سٹنٹ کہا جاتا ہے خون کی نالیوں کو کھلا رکھنے کے لیے استعمال کی جاتی ہیں، لیکن یہ خود بھی بند ہو سکتی ہیں۔

جرمنی کے ماہرین کی ایک ٹیم نے کامیابی سے ایسے نئے سٹنٹ بنانے کا دعویٰ کیا ہے جو خراب نہیں ہوتے۔ اسی طرح آئرلینڈ کی ایک ٹیم نے کہا ہے کہ وہ سٹنٹ کو محفوظ کرنے کے لیے ایک نئی طرح کی کوٹنگ پر تجربہ شروع کرنے والی ہے۔

دِل کی شریانوں کو کھلا رکھنے کے لیے سٹنٹ کی ضرورت عارضی ہوتی ہے لیکن اس وقت استعمال ہونے والے دھات کے سٹنٹ پوری عمر کے لیے نصب ہوتے ہیں۔ لیکن یہ خطرہ رہتا ہے کہ ان کے اندر بھی خون جم جائے گا۔

جرمنی کی ٹیم جن سٹنٹ پر کام کر رہی ہے ایسے میگنیشیم سے بنتے ہیں جو چار ماہ میں خودبخود تحلیل جائیں گے۔ ماہرین نے کہا ہے کہ اس تکنیک پر مزید کام کرنے کی ضرورت ہے۔