Tuesday, 10 October, 2006, 07:17 GMT 12:17 PST

گوگل نے یوٹیوب خرید لیا

ویب سرچ گوگل تفریحی ویڈیو والی ویب سائٹ یو ٹیوب (YouTube) کو ایک اعشاریہ پینسٹھ ارب ڈالر کے عوض خریدنے پر تیار ہوگئی ہے۔

یو ٹیوب کا آغاز صرف انیس مہینے پہلے ایک گیراج سے ہوا تھا اور اس کا شمار مشہور تفریحی ویب سائٹوں میں ہوتا ہے۔ اس کے ماہانہ دیکھنے والوں کی تعداد بہتر (72) ملین ہے۔

گوگل اور یو ٹیوب صارفین کے تعاون سے اپنا ڈیٹا بڑھاتے ہیں اور تھوڑے ہی عرصے میں دونوں نے حیران کن ترقی کی ہے۔

یوٹیوب خریدنے کے باوجود گوگل اپنی گوگل ویڈیو کو جاری رکھے گا اور اس کے ساتھ یوٹیوب اپنی علیحدہ حثیت سے چلتی رہے گی۔

یوٹیوب پر لوگ اپنی ویڈیو لگا سکتے ہیں جہاں اسے کوئی بھی دیکھ سکتا ہے۔

یوٹیوب کا آغاز صرف انیس مہینے پہلے ہوا اور آج اس پر ایک سو ملیئن ویڈیو کلپ موجود ہیں۔

ماہرین کا خیال ہے کہ یوٹیوب اور گوگل کا اکھٹا ہونا ویب سائٹ کے استعمال کرنے والوں کے تعاون سے بننے والی سائٹ کے لیئے بہت بڑی بات ہے۔

یوٹیوب کو فروری 2005 میں کچھ ویڈیو کے شوقین افراد نے ایک گیرج سے شروع کیا اور اب بھی اس کے سٹاف کی تعداد صرف سڑسٹھ ہے۔