Wednesday, 29 March, 2006, 06:37 GMT 11:37 PST

سورج گرہن کا عمل مکمل

منگولیا کی شمالی سرحد پر سورج کے غروب ہونے کے ساتھ ہی سورج گرہن کا عمل مکمل ہو گیا ہے۔

سورج گرہن کا آغاز برازیل سے ہوا اور تین گھنٹے کے بعد یہ عمل اپنے اختتام کو پہنچا۔ یہ سورج گرہن براعظم افریقہ اور ایشیا کے ممالک سے ہوتا ہوا منگولیا میں ختم ہوا۔

سورج گرہن کی تصاویر

مکمل گرہن کے دوران ان علاقوں پر مکمل تاریکی چھاگئی اور سورج نے روشنی کے ایک دائرے کی شکل اختیار کر لی۔ اس دوران ماہرین فلکیات اور سائنسدانوں نے سورج کی’کورونا‘ نامی اس سطح کا مطالعہ بھی کیا جسے عام طور پر دیکھنا ناممکن ہے۔ بہت سے ماہرین فلکیات نے یہ نظارہ دیکھنے کے لیئے لیبیا کا رخ کیا کیونکہ وہاں یہ نظارہ چار منٹ سات سیکنڈ تک دیکھا گیا۔

گھانا سے منگولیا تک کے 14500 کلومیٹر کے علاقے میں چاند نے کئی منٹوں کے لیئے سورج کی سطح کو مکمل طور پر ڈھانپ لیا۔ برطانیہ کی شاہی مشاہدہ گاہ سے منسلک ایک سینیئر ماہر فلکیات رابٹ میسے کہتے ہیں کہ یہ ایک زبردست نظارہ تھا۔

ان کا کہنا ہے کہ یہ اتنا زبردست اور خاص موقع ہے کہ کوئی بھی اس سے متاثر ہوئے بغیر نہیں رہ سکتا۔

سورج گرہن دراصل وہ وقت ہے جب دن رات میں بدل جاتا ہے اور چاند کا تاریک سایہ سورج کی روشنی کو چھپا دیتا ہے۔ اس موقع پر آسمان کا نظارہ کرنے کے شوقین افراد کو متنبہ کیا گیا تھا کہ وہ گرہن کے دوران سورج کی طرف براہ راست دیکھنے سے گریز کریں۔

برطانیہ میں اسے مقامی وقت کے مطابق 10:45 سے لے کر 12:25 تک دیکھا گیا۔
برطانیہ میں ماہرین نے خصوصاً بچوں کی لیئے تنببہ جاری کی تھی کہ وہ براہ راست سورج کی طرف نہ دیکھیں کیونکہ اس سے نظر کمزور ہونے سے لے کر بینائی ختم ہونے جیسے مسائل کا سامنا ہو سکتا ہے۔

گزشتہ 25 سال میں 16 بار سورج گرہن ہوچکا ہے۔اگلا سورج گرہن یکم اگست 2008 کو دیکھا جاسکے گا۔