Tuesday, 28 February, 2006, 11:56 GMT 16:56 PST

چاکلیٹ دل کے لیئے اچھا

سائنسدانوں نے حال ہی میں ایک مزیدار تحقیق کی ہے جس کے مطابق چاکلیٹ کھانا دل کے لیئے اچھا ہے۔

ہالینڈ کے ماہرین کا کہنا ہے کہ بڑی عمر کے وہ افراد جو چاکلیٹ کھاتے ہیں ان کا بلڈ پریشر کم رہتا ہے اور اس طرح سے دل کی شریانیں بند ہوکر دورے پڑنے کا امکان بھی کافی کم ہوجاتا ہے۔

سائنسدانوں کا کہنا ہے کہ کو کو میں ایسے اجزا پائے جاتے ہیں جن سے دوران خون صحت مند رہتا ہے۔

تاہم برطانوی سائنسدانوں نے خبردار کیا ہے کہ چاکلیٹ کے شوقین افراد یہ تحقیق پڑھ کر چاکلیٹ کھانے لیئے اپنے آپ کو آزاد نہ محسوس کریں کیونکہ اس ایک فائدے کے ساتھ ساتھ چاکلیٹ کھانے کے کئی نقصان بھی ہیں۔

ان کا کہنا ہے کہ صحت میں بہتری لانے کے اور بھی کئی بہتر طریقے موجود ہیں۔

سترہویں صدی سے ہی سائنسدان چاکلیٹ کا تعلق دل کی صحت سے جوڑنے کی کوشش میں ہیں۔ تاہم ہالینڈ کی اس پندرہ سالہ تحقیق میں پہلی مرتبہ چاکلیٹ اور دل کا براہ راست تعلق بتایا گیا ہے۔

کو کو (وہ پھل جس سے چاکلیٹ بنتا ہے) میں فلیون تھری آئل نامی کیمیائی جز پایا جاتا ہے جو بلڈ پریشر کم کرنے میں معاون ہے۔

دوسری جانب برٹش ہارٹ فاؤنڈیشن ک کہنا ہے کہ اگر ڈارک چاکلیٹ تھوڑی مقدار میں کھایا جائے تو اس سے دوران خود پر اچھے اثرات مرتب ہوتے ہیں تاہم ابھی یہ نہیں معلوم ہوسکا ہے کہ طویل عرصے تک چاکلیٹ کھانے سے کیا اثرات ہوتے ہیں۔

ہارٹ فاؤنڈیشن کے مطابق چاکلیٹ کھانے کے فوائد سے زیادہ نقصانات ہیں۔ ’اس کا یہ مطلب نہیں کہ آپ چاکلیٹ کھانا ہی چھوڑ دیں، کبھی کبھی منہ کے ذائقے کےلیئے تھوڑی بہت چاکلیٹ انجوائے کی جاسکتی ہے‘۔