Saturday, 09 April, 2005, 14:48 GMT 19:48 PST

مریخ کیلیے نیا یورپی خلائی مشن

یورپ نے تصدیق کی ہے کہ وہ مریخ پر ایک خلائی جہاز بھیجنے کا ارادہ رکھتا ہے تاکہ وہاں ماضی یا حال میں زندگی کی موجودگی کے بارے میں شواہد کی موجودگی کا پتہ چلایا جا سکے۔

یورپی خلائی ایجنسی کے تیار کردہ مشن میں حرکت کرنے والا ایک روبوٹ بھی شامل ہو گا۔

یہ مشن زمین سے جون دو ہزار گیارہ کو روانہ ہو گا اور جون دو ہزار تیرہ کو سرخ سیارے کی زمین پر اترے گا۔

پچاس کروڑ یورو کی لاگت سے تیار کی جانے والی یہ متحرک لیبارٹری مریخ کی فضا اور زمینی ساخت کا معائنہ کرے گی تاکہ وہاں موجود کسی حیاتیاتی مادے یا زیرِ زمین زلزلے کے شواہد تلاش کیے جا سکیں۔

یورپی خلائی ایجنسی نے سنہ دو ہزار تین میں آخری مرتبہ مریخ کی سرزمین پر بیگل ٹو اتارنے کی کوشش کی تھی جو لاپتہ ہو گیا تھا۔

یورپی خلائی ایجنسی کے ممتاز سائنسدانوں اور حکام نے اس ہفتے ایک ملاقات میں مریخ پر روبوٹ اتارنے کے بہترین طریقِ کار کے تعین پر غور کیا ہے۔

تاہم مشن کی حتمی شکل کے لیے متعدد تجاویز پر پہلے ہی غور جاری ہے۔