Wednesday, 30 March, 2005, 18:04 GMT 23:04 PST

’زمین پر انسان کے مستقبل کو خطرہ‘

زمین کی حالت کے بارے میں اب تک کی جامع ترین رپورٹ میں کہا گیا ہے کہ انسانی کارروائیوں کی وجہ سے شاید مستقبل میں انسانوں کے یہاں رہنے کے لیے ضروری وسائل میسر نہ ہوں۔

رپورٹ میں کہا گیا ہے کہ زمین کے وسائل کا جس طرح استعمال کیا گیا اس سے ناقابل تلافی نقصان ہوا ہے اور زمین پر زندگی ممکن بنانے والا نظام ختم ہو رہا ہے۔

رپورٹ میں کہا گیا ہے کہ ماحول کی بگڑتی ہوئی صورتحال کی وجہ سے غربت، بھوک اور صحت کے مسائل سے نمٹنے کے ہدف حاصل کرنا مشکل ہو جائیں گے۔

رپورٹ میں کہا گیا ہے کہ انسانوں نے انتہائی کم وقت میں زمین پر حیاتیاتی نظام غیر معمولی حد تک بدل دیے ہیں۔

انسانوں نے گزشتہ پچاس سالوں میں جس طرح پانی، لکڑی، تیل اور خوراک کے وسائل استعمال کیے ہیں اس سے ماحول خراب ہوا ہے۔

رپورٹ میں کہا گیا ہے کہ جنگ عظیم دوئم کے بعد آبادی میں ہونے والے اضافے سے قدرتی وسائل کے لیے غیر متوازن دوڑ لگ گئی جو موجودہ صورتحال کی ذمہ دار ہے۔

رپورٹ میں کہا گیا ہے کہ انیس سو پینتالیس کے بعد اتنی زمین ذراعت کے استعمال میں آئی ہے جتنی اس سے پہلے دو صدیوں میں نہیں آئی تھی۔

زمین پر جانوروں کی دس سے تیس فیصد تک اقسام کو خطرے کا سامنا ہے۔