Wednesday, 09 February, 2005, 05:51 GMT 10:51 PST

ستارہ کہکشاں چھوڑ چلا

امریکی ماہرین فلکیات نے کہا ہے کہ انہوں نے پہلی بار ایک ایسی ستارے کی نشاندہی کی ہے جو ہماری کہکشاں مِلکی وے کو چھوڑ رہا ہے۔

ہارورڈ سمِتھ سونین سینٹر فار ایسٹروفزکس کے سائنسدانوں کا خیال ہے کہ یہ ستارہ کسی بلیک ہول کے قریب سے گزرتے وقت اُس کی کشش کے زیر اثر ہماری کہکشاں سے الگ ہوگیا۔

ان کا کہنا ہے کہ یہ ستارہ اب بیس لاکھ کلومیٹر فی گھنٹہ سے زیادہ کی رفتار سے خلا میں موجود خالی پن کی طرف بڑھ رہا ہے۔

سائنسی نظریہ کے مطابق خلا میں موجود بلیک ہول ایک ایسی حالت ہے کہ اُس میں جو چیز داخل ہوجائے وہ وہاں سے کبھی نہیں نکل سکتی۔ سائنسدانوں کا کہنا ہے کہ انہوں نے اس سے قبل کسی ستارے کو اس قدر تیز رفتاری سے کہ وہ کہکشاں کو بھی چھوڑ دے سفر کرتے ہوئے نہیں دیکھا ہے۔