نیویارک، غزہ آپریشن پر مظاہرے

نیویارک میں اتوار کو ہزاروں افراد نے غزہ میں تشدد اور اسرائیل کے خلاف مظاہرہ کیا ہے جبکہ سینکڑوں لوگوں نے اسرائیل کی حمایت میں بھی ایک مظاہرے میں حصہ لیا ہے۔

یہ مظاہرے نیویارک کے مشہور اور انتہائي مصروف علاقے مین ہٹن میں ہوئے ہیں۔

جنگ مخالف تنظیم انٹرنیشنل ایکشن سینٹر کے بینر تلے کئی جنگ مخالف، اور شہری حقوق تنظیموں کی طرف سے نکالا جانیوالا جلوس ٹائمز سکوائر سے شروع ہوا اور سی این این ٹیلیویژن نیٹ ورک کے دفاتر کے سامنے پہنچ کر شرکاء نے دھرنا دے کر غزہ میں ہلاکتوں و تشدد اور سرائیل کے خلاف احتجاجی مظاہرہ کیا۔

مظاہرین میں سے کچھ افراد نے اسرائیلی وزیراعظم کے پتلے اٹھائے ہوئے تھے جنہیں جوتوں کا ہار پہنایا گیا تھا۔ اسرائیل مخالف جلوس کے شرکاء نے غزہ کی حالیہ صورتحال پر امریکی میڈیا کی کوریج کے خلاف بھی تحریری کتبے اٹھائے ہوئے تھے۔

جلوس میں موجود شرکاء او رصحافیوں کے مطابق اس جلوس میں پچیس ہزار سے زائد مرد، عورتوں، اور بچوں نے شرکت کی جن کا تعلق امریکہ سمیت کئي ممالک اور اقوام سے تھا۔ جلوس میں ایک بڑی تعداد یہودی برادری کے اراکین کی بھی تھی جو اسرائیل مخالف نعرے لگا رہی تھی۔

دوسری طرف ٹائمز سکوائر کے پاس ہی اسرائیل کے حق میں بھی مظاہرہ ہوا جس میں سینکڑوں لوگوں نےشرکت کی۔

یاد رہے کہ دنیا بھر میں اسرائیل مخالف مظاہروں کا سلسلہ زور پکڑتا جا رہا ہے اور
برطانیہ کے دارالحکومت لندن میں بھی ہزاروں مظاہرین نے سنیچر کو غزہ میں اسرائیلی فوجی کارروائی کے خلاف مظاہرہ کیا اور فوری جنگ بندی کا مطالبہ کیا تھا۔میٹروپولیٹن پولیس کا کہنا ہے کہ مظاہرے میں تقریباً بیس ہزار افراد نے شرکت کی لیکن بی بی سی کے اندازے کے مطابق مظاہرین پچاس ہزار کے قریب تھے۔