Saturday, 02 August, 2008, 02:37 GMT 07:37 PST

امریکہ بے روزگاری میں مسلسل اضافہ

امریکہ میں سرکاری اعداد شمار کے مطابق اس سال جولائی میں بے روز گاری کی شرح میں پانچ اعشاریہ سات فیصد اضافہ ہوا جوگزشتہ چار سال میں سب سے زیادہ ہے۔

تجارتی اداروں نے اپنے عملے میں کمی مسلسل ساتویں مہینے میں بھی جاری رکھی لیکن یہ کمی توقع سے کم رہی۔

امریکی ادارے برائے محنت کے مطابق معیشت کو اکاون ہزار نوکریوں کا نقصان ہوا ہے جو کہ جون کے مہنیے کے برابر ہے جس میں بے روز گاری کی شرح پانچ اعشاریہ پانچ فیصد رہی تھی۔

اقتصادی ماہرین کو توقع تھی کہ پچھہتر ہزار کے قریب نوکریاں کم ہو گئیں لیکن اس کے باوجود جولائی کے اعداو شمار سے ظاہر ہوتا ہے کہ معیشت کمزور ہے۔

بڑھتی ہوئی تیل، اشیاء خوردونوش کی قیمتوں اور کساد بازاری کی وجہ سے امریکی تجارتی ادارے اپنے عملے میں اصافہ کرنے سے گریز کر رہے ہیں۔

جن شعبوں میں نوکریوں کے نئے مواقعے پیدا ہو رہے ہیں وہ سرکاری دفاتر، تعلیم، مہمانداری اور صحت کا شعبہ ہے۔

تعمیرات کے شعبے میں بائیس ہزار نوکریاں ختم کی گئیں جبکہ صعنتی شعبے میں پینتیس ہزار اسامیوں کی کمی کی گئی۔