Wednesday, 07 May, 2008, 01:23 GMT 06:23 PST

شمالی کیرولائنا میں اوبامہ کی جیت

امریکہ میڈیا کے اندازوں کے مطابق باراک اوبامہ نے شمالی کیرولائنا میں اپنی حریف ہیلری کلنٹن کو شکست دے دی ہے جبکہ انڈیانا میں کڑا مقابلہ ہے جہاں ہیلری کلنٹن کو برتری حاصل ہے۔

امریکہ کی ان دو ریاستوں میں ووٹوں کی گنتی جاری ہے اور توقع ہے کہ اس ریاست کے نتیجے کے بعد شاید واضح ہو سکے کہ ڈیموکریٹ پارٹی کی طرف سے صدارتی امیدوار کون ہوگا۔

مبصرین کہتے ہیں کہ اگر ہیلری کلنٹن دونوں ریاستوں میں شکست کھا گئیں تو صدارتی نامزدگی حاصل کرنے کی دوڑ میں وہ باہر ہو جائیں گی۔

دنوں حریف اس مقصد کے لیے کافی عرصے سے انتخابی جنگ لڑ رہے ہیں۔ اکثر ریاستوں میں باراک اوبامہ کو ہیلری کلنٹن پر برتری حاصل رہی ہے لیکن ہیلری نے کچھ اہم ریاستوں میں باراک اوبامہ کو ہرایا ہے۔ ان دونوں میں سے جو بھی فاتح نکلے گا وہ وائٹ ہاؤس کے لیے ریپبلیکن پارٹی کے امیدوار جان مکین کے مدِ مقابل ہوگا۔

امریکہ میں اکثر ٹیلیوژن نیٹ ورک یہ دعویٰ کر رہے ہیں کہ فی الوقت یہ کہنا کہ انڈیانا میں ہیلری جیتیں گی، قبل از وقت ہے۔ تاہم سی بی ایس کا اندازہ ہے کہ ہیلری وہاں سے جیت جائیں گی۔

انڈیانا میں بہت سے لوگوں نے گزشتہ مقابلوں میں مسز کلنٹن کی حمایت کی ہے۔

باراک اوباما کو اپنی حریف پر ’ناقابلِ شکست‘ برتری حاصل ہے۔ آخری فیصلہ ڈیموکریٹ پارٹی کے اس کنوینش میں ہوگا جو اگست میں ہونا ہے۔