Friday, 11 January, 2008, 02:24 GMT 07:24 PST

محمد البرادعی ایران پہنچ گئے

جوہری نگرانی کے عالمی ادارے آئی اے ای اے کے سربراہ محمد البرادعی ایران کے جوہری پروگرام پر بات چیت کے لیے جمعہ کو تہران پہنچ گئے ہیں۔

اس دو روزہ دورے کے دوران وہ ایران کے صدر محمود احمدی نژاد کے علاوہ ایران کے جوہری پروگرام کے اعلیٰ اہلکاروں سے ملاقات کریں گے۔

خیال کیا جا رہا ہے کہ محمد البرادعی ایرانی حکام سے مطالبہ کریں گے کہ وہ ایران کی جوہری سرگرمیوں کے مزید معائنے کی اجازت دیں۔ یاد رہے کہ البرادعی کا حالیہ دورۂ ایران ایک ایسے وقت میں ہو رہا ہے جب امریکہ کے صدر جارج بش بھی مشرقِ وسطٰی کے دورے پر ہیں۔

اس دورے کے پہلے مرحلے میں اسرائیل پہنچنے پر جارج بش نے کہا ہے کہ ایران خطے کے لیے ایک خطرہ تھا،ہے اور اس وقت تک رہے گا جب تک وہ جوہری ہتھیاروں کی تیاری میں استعمال کی جانے والی یورینیم کی افزودگی ترک نہیں کر دیتا۔

ایران کا موقف ہے کہ اس کا جوہری پروگرام پرامن مقاصد کے لیے ہے اور وہ افزودہ یورینیم کو ایٹمی بجلی گھروں میں استعمال کرنا چاہتا ہے تاہم امریکہ اور مغربی ممالک ایران پر دباؤ ڈال رہے ہیں کہ وہ یورینیم کی افزودگی ترک کر دے۔

افزودگی ترک نہ کرنے پر اقوامِ ممتحدہ کی سلامتی کونسل نے ایران پر کچھ پابندیاں بھی عائد کی ہیں جبکہ امریکہ ایران پر مزید سخت پابندیوں کے نفاذ کے لیے کوشاں ہیں۔