Monday, 26 November, 2007, 14:22 GMT 19:22 PST

ساڑھے چار سو سال کی قید

حماس کے ایک سینیر اعلی کار کو ایک اسرائیلی فوجی عدالت نے ساڑھے چار سو برس قید کی سزا سنائی ہے۔

ایاد ابو شہادم پر اسرائیل کے جنوبی شہر بیرشیبہ میں ایک دوہرے خود کش حملے میں ملوث ہونے کا الزام تھا جس میں سولہ افراد ہلاک اور سو زخمی ہوگئے تھے۔ یہ حملہ سن دو ہزار چار میں ہوا تھا۔

ابو شہادم کو عمر قید کی اٹھارہ سزائیں سنائی گئیں جو انہیں یک بعد دیگرے کاٹنی ہوں گی۔

انہیں یروشلم میں بھی ایک خود کش حملے کی سازش میں ملوث ہونے کا قصوروار پایا گیا۔ اس منصوبے کو ناکام بنا دیا گیا تھا۔

فوجی عدالت کے مطابق ابو شہادم نے دونوں حملوں کے لیے دھماکہ خیز مواد تیار کیا تھا۔

اسرائیلی سکیورٹی فورسز کے مطابق سن دو ہزار تین اور دو ہزار چار کے دوران ابو شہادم کا سولہ دوسرے حملوں میں ہاتھ تھا۔

انہیں تین سال قبل غرب اردن کے شہر ہبرون سے گرفتار کیا گیا تھا۔