بیورو رپورٹ
بی بی سی اسلام آباد

اسمبلی سے استعفے: APDM کا اعلان

حزب اختلاف کی جماعتوں کے اتحاد اے پی ڈی ایم نے صدارتی الیکشن میں صدر جنرل پرویز مشرف کے کا غذات نامزدگی منظور ہونے کی صورت میں قومی اور صوبائی اسمبلیوں سے مستعفی ہونے کا اعلان کیا ہے اور نواز شریف کی جلاوطنی اور عدلیہ کے ساتھ ناانصافی کے خلاف اکیس ستمبر کو ملک گیر ہڑتال کا اعلان بھی کیا ہے۔

اے پی ڈی ایم کا اجلاس اتوار کو صبح دس بجے سے شام تین بجے تک جاری رہا۔ اجلاس کے بعد تحریک انصاف کے رہنما عمران خان نے تمام حزب اختلاف کی طرف سے یہ فیصلہ سنایا کہ صدر جنرل پرویز مشرف کے صدارتی انتخابات کے لیے کاغذات نامزدگی منظور ہونے کی صورت میں حزب اختلاف کے تمام کارکن قومی اور صوبائی اسمبلیوں سے استعفے دے دیں گے۔

اجلاس کے بعد پریس کانفرنس میں راجہ ظفرالحق نے بتایا کہ اے پی ڈی ایم ’آئین کی دفعہ تریسٹھ میں ترمیم‘ کی مذمت کرتی ہے ان کا کہنا ہے کہ حکومت اپنے مقاصد کے لیے ان اہم قوانین کو غیر فعال بنانا چاہتی ہے جو کہ عدلیہ کے ساتھ سراسر ناانصافی ہے۔

اجلاس میں عمران خان کے کراچی شہر میں داخلے پر پابندی کی بھی مذمت کی گئی۔ ان کا کہنا ہے کہ ملک میں کہیں بھی جانا ہر شہری کا حق ہے اور اس حق کی خلاف ورزی کرنا سراسر نا انصافی ہے۔

موجودہ حکومت کے طرز عمل پر احتجاج کرنے کے لیے اے پی ڈی ایم نے اکیس ستمبر بروز جمعہ ملک گیر ہڑتال کا اعلان کیا ہے ۔

حزب اختلاف کے مطابق ملک میں دہشت گردی کے بڑھتے ہوئے واقعات، عدلیہ کی اجازت کے باوجود نواز شریف کی جلاوطنی اور آئین میں ترامیم کی کو ششیں موجودہ حکومت کی نا کامی کا ثبوت ہیں۔