Sunday, 16 September, 2007, 04:49 GMT 09:49 PST

واشنگٹن میں جنگ مخالف مظاہرہ

امریکہ کے دارالحکومت واشنگٹن میں ہزاروں افراد نے ایک جنگ مخالف مظاہرے میں حصہ لیا ہے۔

مظاہرین میں عراق میں ہلاک ہونے والے امریکی فوجیوں کے رشتہ دار بھی شامل تھے جو مطالبہ کر رہے تھے کہ عراق میں فوراً جنگ بند کی جائے۔

مظاہرین نے عراق سے امریکی فوجی کی واپسی کے ساتھ ساتھ صدر بش کے مواخذے کا بھی مطالبہ کیا۔

پولیس اور مظاہرین میں اس وقت جھڑپ ہو گئی جب مظاہرین میں سے کچھ نے امریکی کانگریس کی عمارت کیپیٹل ہل کی طرف جانا شروع کر دیا۔ جب مظاہرین نے پولیس کی لگائی ہوئی رکاوٹوں کو پھلانگنے کی کوشش تو پولیس نے انہیں گرفتار کر لیا۔

خبر رساں ادارے اے پی کے مطابق جنگ مخالف مظاہرے سے کچھ ہی فاصلے پر کچھ لوگ عراق میں جنگ کی حمایت میں بھی اکٹھے ہوئے تھے۔ یہ افراد امریکی فوجیوں کی حمایت اور دہشت گردوں کے خلاف نعرے لگا رہے تھے۔

اے پی کے مطابق ایک ریٹائرڈ ائرفورس کے کرنل رابرٹ پیٹرسن نے شرکاء سے خطاب میں کہا ان کے تین پیغامات ہیں: ’کانگریس، ہمارے فوجیوں سے کھیل کھیلنا بند کر دو، دہشت گردو، ہم تمہیں ڈھونڈ نکالیں گے اور مار دیں گے، اور ہمارے فوجیو، ہم تمہارے لیے یہاں ہیں اور تمہاری حمایت کرتے ہیں۔‘