Sunday, 09 September, 2007, 11:33 GMT 16:33 PST

عراق میں تیسری علاقائی کانفرنس

عراق کے پڑوسی ممالک کی تیسری بڑی کانفرنس اتوار کو بغداد میں شروع ہو رہی ہے۔ اس کانفرنس میں شام اور ایران بھی شامل ہیں۔

کانفرنس میں وزراءخارجہ یا ان کے نمائندوں کے ساتھ اقوامِ متحدہ کی سلامتی کونسل کے مستقل ممبران کے نمائندے بھی شرکت کریں گے۔

اس کے علاوہ عرب لیگ اور جی ایٹ ممالک کے نمائندے بھر شریک ہوں جن میں امریکہ بھی شامل ہے۔کانفرنس میں جو مسائل زیر غور ہوں گے ان میں توانائی ، سکیورٹی، سرحدوں پر کنٹرول اور تشدد کے خوف سے بےگھر ہونے والےعراقیوں کی حالتِ زار شامل ہے۔

پہلی کانفرنس اس سال مارچ میں بغداد میں ہوئی تھی۔

اس کانفرنس میں شام ،ایران اور امریکہ کو ملنے کا موقع بھی ملا کہ وہ غیر رسمی طور پر عراق کے مسئلے پر تبادلہ خیال کریں۔

اس کے بعد مئی میں اسی طرح کا ایک اعلٰی سطحی اجلاس مصر کے ساحلی علاقے شرم الشیخ میں منعقد ہوا تھا۔

عراقی وزیر خارجہ ہوشیار زبیری کا کہنا ہے کہ علاقائی کشیدگی کو دور کرنےاور عراق کے پڑوسیوں کے درمیان مذاکرات کے مواقع مہیا کرانے کے لیےاس طرح کے اجلاس بہت ضروری ہیں خاص طور پر ایران ، شام اور امریکہ جیسے ممالک کے لیے ۔