Friday, 31 August, 2007, 15:11 GMT 20:11 PST

پیغمبرِ اسلام کے کارٹون پر افسوس

پاکستان میں سویڈن کے سفارتخانے نے سویڈن کے اخبار میں شائع ہونے والے اُس کارٹون پر اظہارِ افسوس کیا ہے جس میں پیغمبرِ اسلام کو دکھایا گیا ہے۔

پاکستان نے اس کارٹون پر، جس میں پیغمبرِ اسلام کا سر کتے کے جسم پر دکھایا گیا ہے شکایت کی تھی۔

سویڈن کی حکومت نے کہا ہے کہ اسے اس کارٹون کی اشاعت سے ہونے والی کسی بھی دلآزاری پر افسوس ہے لیکن وہ اس پر معذرت نہیں کرے گی کیونکہ وہ (اشاعت کی) ذمہ دار نہیں ہے اور اس اشاعت بھی نہیں روک سکتی۔

گزشتہ سال بھی پیغمبرِ اسلام کے کارٹونوں کی اشاعت دنیا بھر میں احتجاج کا باعث بن چکی ہے۔

ابتداً ڈنمارک کے ایک روز نامے میں شائع ہونے والے ان خاکوں کے خلاف سنہ دو ہزار چھ میں کئی ممالک میں مسلمان سڑکوں پر آ گئے تھے اور پُر تشدد احتجاج میں کئی لوگ جان سے بھی گئے تھے۔ بعد میں یہ خاکے کئی اور ملکوں میں بھی شائع کیے گئے۔

اسلام میں پیغمبرِ اسلام کے خاکے یا تصویر کی اجازت نہیں ہے اور مسلمان اسے توہینِ رسالت تصور کرتے ہیں۔ اس کے علاوے اکثر مسلمان کتے کو بھی ناپاک جانور تصور کرتے ہیں۔

نیا کارٹون یا خاکہ سویڈن کے اخبار نیریکس الیہانڈا میں اتوار کو شائع ہوا ہے۔

	گزشتہ سال پیغمبرِ اسلام کے کارٹونوں کی اشاعت پر پاکستان میں احتجاج کیا گیا

اس کارٹون کو بنانے والے لارس ولکس نے خبر رساں ادارے ایسوسی ایٹڈ پریس سے گفتگو کرتے ہوئے کہا ہے کہ یہ خاکہ فن ہے اور ’سب جانتے ہیں کہ میں اسلام کے خلاف نہیں ہوں‘۔

کارٹون کا اشاعت پر اس ہفتے کے اوائل میں ایرانی حکومت بھی سویڈن کی حکومت سے شکایت کر چکی ہے۔

پاکستان کی وزارتِ خارجہ نے اسلام آباد میں سویڈن کے سفارتخانے کو اپنی شکایت جمعرات کو موصول کرائی تھی۔