Wednesday, 15 August, 2007, 23:45 GMT 04:45 PST

تورہ بورہ میں پھر امریکی کارروائی

سینکڑوں امریکی اور افغان فوجیوں نےاوسامہ بن لادن کی پناہ گاہ سمجھی جانے والی تورہ بورہ کی پہاڑیوں پر حملہ شروع کر دیا ہے۔

امریکی فوج کا کہنا ہے کہ امریکی اور افغان افواج نے پاکستان سے ملحقہ پہاڑیوں میں القاعدہ اور طالبان شدت پسندوں کے خلاف زمینی اور فضائی حملے شروع کر دیے ہیں۔

اتحادی افواج کی ترجمان کیپٹن ونیسا بومن نے بتایا کہ فوج کی خاص توجہ ملک کے شمالی خطے میں تورا بورا کی پہاڑیوں پر ہوگی۔انہوں نے کہا کہ دشوار گزار یہ پہاڑی علاقے شدت پسندوں کی پناہ گاہوں کے لیے نہایت موضوع رہا ہے۔

2001 میں اوسامہ بن لادن کو پکڑنے کے لیے اس علاقے میں کی گئی ایک بڑی امریکی فوجی کارروائی نا کام رہی تھی۔

اطلاعات ہیں کہ تازہ لڑائی کے سبب لوگ یہ علاقہ چھوڑ کر بھگ رہے ہیں۔
اس آپریشن کی خبر ایک ایسے وقت میں آئی ہے جب کابل کے نزدیک ایک دھماکے میں تین جرمن باشندے ہلاک اور چوتھا زخمی ہوگیا تھا۔

یہ چاروں ایک سفارتی قافلے میں سفر کر رہے تھے۔

پولیس کا کہنا ہے کہ یہ ایک ریموٹ کنٹرول سے کیا گیا بم دھماکہ تھاجس سے ایک گاڑی پوری طرح تباہ ہو گئی تھی۔

کابل میں ایک علیحدہ واقعہ میں برطانوی سفارت خانے کی حفاظت پر معمور ایک پرائیوٹ سکیورٹی فرم کے لیے کام کرنے والے برطانوی شہری کو نامعلوم حملہ آوروں نے ہلاک کر دیا