Monday, 25 June, 2007, 03:57 GMT 08:57 PST

اسرائیل پر رشوت، استحصال کا الزام

فلسطینی انتظامیہ کے معزول وزیر اعظم اسماعیل ہنیہ نے اسرائیل کی طرف سے محمود عباس کے تحت فلسطینی اتھارٹی کی ایمرجنسی حکومت کے لیے فلسطین کے منجمد ٹیکس فنڈ کے اجراء کی منظوری کو رشوت ستانی اور سیاسی استحصال قرار دیا ہے۔ اسماعیل ہنیہ کی جماعت حماس اس حکومت کا حصہ نہیں ہے۔

اسرائیل نے گزشتہ سال حماس کی انتخابات میں کامیابی کے بعد لاکھوں ڈالروں کی ادائیگی روک دی تھی۔

اسماعیل ہنیہ نے پیر کے روز فلسطینی انتظامیہ کے صدر محمود عباس، اسرائیلی وزیر اعظم ایہود اولمرت، مصر کے صدر حسنی مبارک اور اردن کے شاہ عبداللہ کے درمیان ہونے والے سربراہی اجلاس کو بھی تنقید کا نشانہ بنایا۔

اسرائیل کی طرف سے اب رقم کی ادائیگی کا مقصد حماس کے بر خلاف غزہ کی پٹی میں محمود عباس کی سیاسی پوزیشن کو مضبوط بنانا ہے۔

ایک اسرائیلی وزیر نے کہا ہے کہ فلسطینی اتھارٹی کو ٹیکسوں سے حاصل ہونے والی یہ رقم مرحلہ وار دی جائے گی تا کہ یہ رقم حماس کے ہاتھوں میں نہ چلی جائے۔

ایہود اولمرت نے کہا ہے کہ ان فنڈز سے نئی فلسطینی حکومت کو ’بتدریج مدد‘ ملتی جائے گی جو ظاہر ہے کہ حماس کی حکومت نہیں ہے۔

اس ہلکار کا کہنا تھا کہ یہ رقم فلسطینی صدر کی طرف سے طلب کی جانے والی رقم سے سات سو ملین کم ہے۔

یہ رقم گزشتہ ہفتے امریکہ، یورپی یونین اور اسرائیل کے اس اعلان کے بعد جاری کی جانے والی ہے جس میں کہا گیا تھا کہ محمود عباس کی جانب سے ایمرجنسی حکومت کی تشکیل کے بعد فلسطینی انتظامیہ پر نافذ اقتصادی پابندیاں ختم کر دی گئی ہیں۔

فلسطینی صدر محمود عباس حماس پر یہ الزام لگا چکے ہیں کہ اس نے اسرائیل کو سارے فلسطینی عوام کو سزا دینے کا جواز مہیا کیا۔

یورپی یونین نے کہا ہے کہ وہ فلسطینی حکومت کو مستحکم کرنے کے لیے اس کے قرض اتارنے کے لیے تین کروڑ ڈالر فراہم کرے گا۔