Sunday, 17 June, 2007, 10:19 GMT 15:19 PST

ایلن جانسٹن: رہائی کی خبر پر نظر ہے

برطانوی دفتر خارجہ نے کہا ہے کہ وہ ان اطلاعات کا جائزہ لے رہا ہے کہ مارچ میں غزہ سے اغوا ہونے والے بی بی سی کے نامہ نگار ایلن جانسٹن کو شاید رہا کیا جا رہا ہے۔

اطلاعات میں تہران میں حماس کے ترجمان کے حوالے سے کہا جا رہا کہ ایلن جانسٹن کی رہائی اگلے چند گھنٹوں میں ہونے والی ہے۔

ترجمان کا کہنا ہے کہ اگر ایسا نہیں ہوتا تو اس کی وجہ صرف ایلن جانسٹن کی سکیورٹی ہو سکتی ہے۔

تہران میں حماس کے ترجمان کے بعد غزہ میں بھی حماس کے ایک ترجمان نے کہا ہے کہ اگرچہ ایلن کی رہائی کے لیے بھرپور کوششیں ہو رہی ہیں لیکن وہ یہ نہیں جانتے کہ نامہ نگار کو کب رہا کیا جا رہا ہے۔

جمعہ کو حماس کے عسکری بازو نے کہا تھا کہ وہ ایلن جانسٹن کی رہائی ممکن بنانے کے لیے سنجیدہ اور عملی اقدامات کر رہا ہے۔