Sunday, 20 May, 2007, 20:47 GMT 01:47 PST

حماس رہنما کےگھر حملہ، آٹھ ہلاک

حکام اور عینی شاہدین کے مطابق اسرائیل نے غزہ میں حماس کے ایک رہنما خلیل الحیہ کےگھر پر فضائی حملہ کیا ہے جس میں ان کے آٹھ عزیز ہلاک اور بارہ زخمی ہوئے ہیں۔

حملے کے وقت حماس کے رہنما گھر پر نہیں تھے۔ خبر رساں ایجنسی اے پی کے مطابق حملے کے بعد حماس کے رہنما نے غزہ شہر میں شفا ہسپتال کا دورہ کیا جہاں زخمیوں کو علاج کے لیے لایا گیا تھا۔

خلیل الحیہ نے رپورٹروں سے باتیں کرتے ہوئے کہا کہ ’ہم تمام تر مشکلات، شہادتوں اور اور ان تکالیف کے باوجود، جومیں اور میرے لوگ برداشت کر رہے ہیں، آگے بڑھتے رہیں گے‘۔

اسرائیلی فوج نے شمالی غزہ میں اتوار کی شام ایک فضائی کارروائی کی تصدیق کی لیکن اس کا کہنا تھا کہ حملے کا نشانہ مسلح افراد کا ایک گروہ تھا جو ایک مکان کے باہر کھڑا تھا۔

کابینہ نے اس حملے سے کئی گھنٹے قبل غزہ میں کارروائیاں شدید کرنے کی منظوری دی تھی۔ غزہ سے راکٹ حملوں کے جواب میں ہونے والی حالیہ اسرائیلی فضائی کارروائیوں میں تئیس افراد ہلاک ہو چکے ہیں۔

اسرائیل کی طرف سے جوابی کارروائی کے باوجود فلسطینیوں کے راکٹوں سے حملے جاری ہیں۔

جنوبی اسرائیل میں بی بی سی کے ایک نامہ نگار کے مطابق اتوار کے روز کئی سڑکیں ویران تھیں جہاں سے سینکڑوں رہائشی فضائی حملوں سے بچنے کے لیے گھروں سے چلے گئے تھے۔

پیر کو علی الصبح اسرائیل نے ایک مرتبہ پھر غزہ پر ایک میزائیل حملہ کیا ہے جس کے بارے میں اس کا کہنا ہے کہ اس میں حماس کا ایک رکن ہلاک ہوا ہے اور ان عماتوں کو نقصان پہنچا ہے جہاں پر یہ گروپ ہتھیار بناتا ہے۔