Thursday, 10 May, 2007, 00:28 GMT 05:28 PST

بلیئر آج اہم اعلان کریں گے

توقع کی جارہی ہے کہ برطانیہ کے وزیرِ اعظم ٹونی بلیئر آج (جمرات کو) اپنے استعفے کی تاریخ کا اعلان کر دیں گے۔

ٹونی بلیئر اس وقت تک ملک کے وزیرِ اعظم رہیں گے جب تک ان کی جماعت ان کے متبادل کا چناؤ نہیں کر لیتی۔ اس میں چھ یا سات ہفتے تک لگ سکتے ہیں۔

بی بی سی کے سیاسی نامہ نگار جان ڈیوٹ کا کہنا ہے کہ جب ٹونی بلیئر اپنی جماعت کے سینیئر ترین ساتھیوں کو اپنے جانے کی تاریخ بتائیں گے تو یہ ان کے لیے کوئی حیرانی کی بات نہیں ہو گی۔

اگرچہ سرکاری طور پر اس کی تصدیق نہیں ہوئی ہے تاہم کئی مہینوں سے ٹونی بلیئر کے اقتدار سے جانے کا ٹائم ٹیبل بالکل واضح ہے۔

جب وہ اس بات کا اعلان کریں گے کہ وہ لیبر پارٹی کی قیادت سے دستبردار ہو رہے ہیں تو ان کے جانشین کے لیے مقابلے کا عمل شروع ہو جائے گا۔

یہ مہم سات ہفتے تک چلے گی، اگرچہ اس وقت تک صرف ایک سنجیدہ امیدوار ہی نظر آ رہے ہیں اور وہ ہیں چانسلر یا وزیرِ خزانہ گورڈن براؤن۔

انتخابی مہم کے دوران ٹونی بلیئر وزارتِ عظمیٰ کے عہدے پر فائز رہیں گے۔

ٹونی بلیئر کے سرکاری عملے کا کہنا ہے کہ وہ سیاسی افق سے غائب ہو جانے کی بجائے اپنے آپ کو مصروف رکھے رہیں گے جن میں غیر ممالک کے دورے بھی شامل ہیں۔

ٹونی بلیئر کے ہاتھ سے اقتدار کی رسی تو آہستہ آہستہ کئی مہینوں سے پھسل رہی ہے لیکن سرکاری اعلان سے اب سرکاری اہلکار اور لیبر پارٹی کے دوسرے اراکین وہ باتیں کھلے عام کر سکیں گے جو وہ پردے کے پیچھے کہہ رہے تھے۔ اور ان میں سرِ فہرست یہ ہے کہ اگلے عام انتخابات سے پہلے ایک نئی اور نوجوان ٹوری قیادت کے سسامنے ٹونی بلیئر کے بعد کی لیبر پارٹی کی ہیئت کیا ہو۔