Sunday, 29 April, 2007, 17:42 GMT 22:42 PST

ترکی: سیکولرازم کے حق میں جلوس

ترکی میں صدارتی انتخابات کے تنازعہ کے دوران ہزاروں لوگوں نے اتوار کو استنبول میں سیکولرازم کے حق میں مظاہرہ کیا ہے۔

مظاہرین کے مطابق انہیں خدشہ ہے کہ حکومتی جماعت کے صدارتی امیدوار اپنی اسلامی بنیادوں کے ساتھ مخلص رہیں گے۔

صدارتی امیدوار عبداللہ گل پہلے ہی کہہ چکے ہیں کہ اپنے مخالفین اور فوج کی طرف سے شدید تنقید کے باوجود عہدہ نہیں چھوڑیں گے۔

عبداللہ گل صدراتی انتخابات کے پہلے مرحلے میں جیت نہیں سکے کیونکہ حزب مخالف کے ارکان اسمبلی نے اس مرحلے کا بائیکاٹ کر دیا تھا۔ یہ ارکان اس مرحلے کی قانونی حیثیت کو آئینی عدالت میں چیلنج بھی کر رہے ہیں۔

جمعہ کو فوج نے اپنے ایک بیان میں حکومت پر شدت پسند اسلام کو برداشت کرنے پر تنقید کرنے کے علاوہ اس بات کا بھی اعادہ کیا تھا کہ فوج مذہب اور سیاست کو الگ رکھنے کے اپنے مؤقف پر قائم رہے گی۔

	عبداللہ گل کو قدرے نرم خیالات کا حامل سمجھا جاتا ہے

اتوار کے مظاہرین کے علاوہ ملک کی کاروباری شخصیات نے بھی ایک بیان میں عدالت سے درخواست کی ہے کہ وہ پہلے مرحلے کی ووٹنگ کو کالعدم قرار دے کر قبل از معیاد انتخابات کی راہ ہموار کرے۔

عبداللہ گل نے وزیرخارجہ کے طور پر ترکی کی یورپی یونین میں شمولیت کے لئے ہونے والے مذاکرات میں ملک کی نمائدگی کی تھی اور انہیں جسٹس پارٹی سے تعلق رکھنے والے وزیر اعظم طیب اردغان کے مقابلے میں قدرے نرم خیالات کا حامل سمجھا جاتا ہے۔

صدارت کے امیداوار کے طور پر اپنی نامزدگی پر انہوں نے کہا تھا ’ترکی کے صدر کے لیے ضروری ہے کہ وہ مذہب اور سیاست کو الگ رکھنے کا قائل ہو اور اگر میں صدر منتخب ہوتا ہوں تو میں ایسا ہی کروں گا۔‘ لیکن کچھ تجزیہ کاروں کا کہنا ہے کہ عبداللہ گل اپنی مذہبی بنیادوں سے قربت رکھتے ہیں اور ان کی اہلیہ ملک کی پہلی خاتون اول ہوں گی جو سر پر سکارف لیں گی۔

ترکی میں بی بی سی کے نامہ نگار کا کہنا ہے کہ ملک کے سکیولر الیٹ کو خدشہ ہے کہ عبداللہ گل کی کامیابی سے ترک جمہوریہ کو نقصان ہوسکتا ہے۔

فوج کی جانب سے جاری کیے جانے والے بیان کو آئینی عدالت کے لیے اشارہ سمجھا جارہا ہے۔

دوسرے دور کی ووٹنگ بدھ کو متوقع ہے اور ترکی کی آئینی عدالت نے کہا ہے کہ اور بدھ سے قبل ہی اس بارے میں اپنا فیصلہ سنائے گی۔ اگر آئینی عدالت نے پہلے دور کی ووٹنگ کو ناقص قرار دیا تو وزیراعظم طیب اردغان کو ملک میں عام انتخابات کرانے ہوں گے۔