Wednesday, 11 April, 2007, 23:51 GMT 04:51 PST

امریکی فوجیوں کے قیام میں توسیع

امریکی محکمہ دفاع نے افغانستان اور عراق میں فوجیوں کی تعیناتی کی مدت کو ایک سال سے بڑھا کر پندرہ ماہ کر دیا ہے۔

امریکی محکمہ دفاع کے نئے رولز کے مطابق عراق اور افغانستان میں تعینات فوجی یا بعد میں تعینات کیے جانے والے فوجی بارہ ماہ کی بجائے پندرہ ماہ بعد وطن واپس جا سکیں گے۔

امریکی فوجی افغانستان اور عراق میں تعیناتی کی مدت پوری کرنے کے جب واپس وطن پہنچیں گے تو ان کو ایک سال تک امریکہ میں ہی تعینات کیا جا سکے گا۔

واشنگٹن میں بی بی سی کے نامہ نگار ایڈم بروک کا کہنا ہے کہ فوجیوں کی تعیناتی سے متعلق رولز میں تبدیلی اس بات کی نشاندی کرتی ہے کہ امریکہ کو عراق اور افغانستان میں اپنے فوجیوں کو تعداد کو برقرار رکھنے کے لیے اپنے نئے رولز بنانے کی ضرورت پڑھ رہی ہے ۔

عراق میں ایک لاکھ پینتالیس ہزار امریکی فوجی تعینات ہیں۔ امریکی صدر جارج بش میں حالات کو قابو میں کرنے کے لیے مزید اکیس ہزار مزید فوجی عراق بھیجنے کا فیصلہ کیا ہے جن میں کئی ہزار پہلے ہی عراق میں پہنچ چکے ہیں۔