Sunday, 25 March, 2007, 03:22 GMT 08:22 PST

بحر الکاہل اور جنوبی میں زلزلے

اتوار کی صبح جاپان کے سب سے بڑے جزیرے ہونشو پر سات اعشاریہ ایک کی شدت کا ایک زلزلہ آیا ہے جبکہ ایک دوسرا زلزلہ جنوبی بحرالکاہل میں ونواتو کے مقام پر آیا ہے۔

ابتدائی اطلاعات کے مطابق جاپان کے ساحل پر آنے والے زلزلے میں کم سے کم ایک شخص ہلاک ہوگیا جبکہ چالیس افراد زخمی ہوگئے۔ اس زلزلے کے جھٹکے ٹوکیو تک محسوس کیے گئے۔

جاپانی حکام نے سونامی کی وارننگ جاری کی ہے اور خدشہ ہے کہ پچاس سینٹی میٹر تک کی موجیں آسکتی ہیں۔ سونامی سمندر میں زلزلے سے پیدا ہونے والی موجوں کو کہا جاتا ہے۔

جاپان میں یہ زلزلہ مقامی وقت کے مطابق صبح نو بجکر بیالیس منٹ پر آیا اور اس کا مرکز ٹوکیو کے شمال مغرب میں 300 کلومیٹر کی دوری پر تھا۔

دوسرا زلزلہ جنوبی بحرالکاہل میں ونواتو کے قریب آیا اور امریکی ماہرین کے مطابق اس کی شدت سات اعشاریہ دو تھی۔ ابتدائی اطلاعات میں کسی کے ہلاک ہونے کی رپورٹ نہیں ہے۔

ونواتو میں ایک اور زلزلہ بھی محسوس کیا گیا۔ تاہم حکام نے سونامی کی کوئی وارننگ نہیں جاری کی ہے۔ لیکن ہنگامی حالات سے نمٹنے والے ادارے زلزلے کے اثرات کے بارے میں معلومات حاصل کررہے ہیں۔