Saturday, 03 March, 2007, 04:23 GMT 09:23 PST

ایران پر پابندیاں، اہم پیش رفت

امریکہ نے کہا ہے ایران کے خلاف سخت پابندیوں عائد کرنے کےمعاملے پر اہم پیش رفت ہوئی ہے۔

امریکی وزات خارجہ کے اعلی افسر نے کہا ہے کہ ایران پر پابندیاں لگانے کے معاملے میں امریکہ، برطانیہ، فرانس، جرمنی، چین اور روس کے مابین ہونے والی بات چیت میں اہم پیش رفت ہوئی ہے۔

اقوام متحدہ نے دسمبر 2006 میں ایران کو مہلت دی تھی کہ وہ ساٹھ روز کے اندر جوہری پروگرام کو روک دے وگرنہ اس کو پابندیوں کا سامنا کر پڑ سکتا ہے۔
ساٹھ روز کے گزرے پر اقوام متحدہ کے جوہری نگران ادارے آئی اے ای اے نے اقوام متحدہ کو رپورٹ دی ہے کہ ایران نے اقوام متحدہ کی طرف سے یورینیم کی افزودگی روکنے کی آخری تاریخ کو کوئی پرواہ نہیں کی ہے۔

اطلاعات کے مطابق جمعرات کے روز ہونے والی ٹیلی فونک کانفرنس کے بعد سفارت کار ایران پر نئی پابندیوں سے متعلق نئی قرارداد کی تیاری شروع کر دیں گے۔

نئی تجاویز کے تحت ایران کے اعلی حکام کے سفر پر قدغن سمیت کئی اور پابندیاں بھی لگائی جا سکتی ہیں۔

ادھر ایران اپنے موقف پر قائم ہے کہ وہ جوہری پروگرام پر کوئی سمجھوتہ نہیں کرے گا۔

ایران کے صدر احمدی نژاد نے کہا کہ ایران کے جوہری پروگرام کو روکنے یا اس کو ریوریس کرنے کا کوئی امکان نہیں ہے۔

انہوں نے کہا ایران ایٹمی ہتھیار حاصل کرنے کی کوشش نہیں کر رہا ہے اور اس کا جوہری پروگرام پرامن مقاصد کے لیے ہے۔