Tuesday, 16 January, 2007, 18:57 GMT 23:57 PST

اوبامہ وائٹ ہاؤس کی دوڑ میں شامل

سینیٹر بیرک اوبامہ نے وائٹ ہاؤس کی صدارتی دوڑ میں شامل ہونے کے لیے پہلا قدم اٹھا لیا ہے جس سے امریکہ کی تاریخ میں پہلے سیاہ فام شخص کے صدارتی عہدہ سنبھالنے کے امکانات پیدا ہوگئے ہیں۔

بیرک اوبامہ، جو ڈیموکریٹ ہیں، کہتے ہیں کہ انہوں نے اپنی ویب سائٹ پر ایک تحقیقاتی کمیٹی قائم کی ہے جو صدارتی مہم کے لیے عملہ اور فنڈز فراہم کرنے میں معاون ثابت ہوگی۔

اوبامہ ڈیموکریٹ پارٹی کے مقبول ہوتے رہنما ہیں۔ 2004 کے ڈیموکریٹک کنونشن میں ان کی دھواں دھار تقریر ان کی مقبولیت کی ابتدا ثابت ہوئی۔ انہوں نے عراق جنگ کی مخالفت کی تھی۔

بدمزہ سیاست  ’سیاست پیسے اور اثر و رسوخ سے اتنی بدمزہ ہوچکی ہے کہ ہم وہ بڑے بڑے مسائل حل ہی نہیں کرپارہے جنہیں حل کرنے کی ضرورت ہے۔ ہمیں سیاست کا طریقہ کار بدلنا ہوگا اور مشترکہ مقادات اور خدشات کے مطابق چلنا ہوگا   اوبامہ

ان کا کہنا ہے کہ ’سیاست پیسے اور اثر و رسوخ سے اتنی بدمزہ ہوچکی ہے کہ ہم وہ بڑے بڑے مسائل حل ہی نہیں کرپارہے جنہیں حل کرنے کی ضرورت ہے۔ ہمیں سیاست کا طریقہ کار بدلنا ہوگا اور مشترکہ مقادات اور خدشات کے مطابق چلنا ہوگا‘۔

2004 میں منتخب ہونے کے بعد سے 45 سالہ اوبامہ عوام کی بے انتہا دلچسپی کا مرکز رہے ہیں۔

2004 کی مشہور تقریر کے دوران انہوں نے اپنے ماضی کے بھی کئی اوراق کھول ڈالے اور بتایا کہ ان کے والد کینیائی جبکہ والدہ سفید فام تھیں۔ انہوں نے کہا کہ صدارتی انتخاب لڑنے کے بارے میں وہ 10 فروری کو اعلان کریں گے۔ اوبامہ کو ہیلری کلنٹن کےمقابلے میں مضبوط امیدوار سمجھا جارہا ہے۔

ہیلری نے ابھی صدارتی انتخاب لڑنے کا اعلان نہیں کیا ہے۔