Tuesday, 09 January, 2007, 12:58 GMT 17:58 PST

اسرائیلی فوجی کی ’صحت ٹھیک ہے‘

غزہ کی سرحد کے قریب حراست میں لیے جانے والے اسرائیلی فوجی کے بارے میں اطلاعات ہیں کہ وہ خیریت سے ہے اور اس کی ’صحت ٹھیک ہے۔‘

گلعاد شالیط نامی اس فوجی کو پچھلے سال جون میں ایک فلسطینی تنظیم نے اپنی تحویل میں لے لیا تھا اور یہ پہلی مرتبہ ہے کہ اس کی حالت کے بارے میں کچھ بتایا گیا ہو۔

اسرائیلی فوجی گرفتار

خبر رساں ادارے اے پی کے مطابق فلسطینی تنظیم ’پاپیولر رزسٹنس کمیٹیز‘ نے ایک بیان میں کہا ہے کہ ’گیلعاد شالیط کی صحت اچھی ہے‘۔

بیان میں یہ بھی کہا گیا ہے کہ کارپورل شالیط کے ساتھ جنگی قیدیوں کے لیے اسلامی اصولوں کے مطابق سلوک کیا جائے گا۔

بیان میں تنظیم کے ابو مجاہد نامی رکن نے کہا ہے کہ ’اگر ہمارے مطالبات پر عمل نہ کیا گیا تو ہم انہیں برسوں تک رکھنے کے لیے تیار ہیں۔‘

اس اسرائیلی فوجی کو سات ماہ پہلے فلسطینی عسکریت پسندوں نے حراست میں لیا تھا۔ ان کا مطالبہ تھا کہ اس کے بدلے میں اسرائیل ایک ہزار فلسطینی قیدیوں کو رہا کرے۔