Monday, 11 December, 2006, 05:45 GMT 10:45 PST

افغان صورتحال پر کرزئی دکھی

افغان صدر حامد کرزئی نے کابل میں ایک جذباتی تقریر کرتے ہوئے کہا ہے کہ افغان بچے، عورتیں اور مرد صرف پاکستان سے آنے والے ’دہشت گردوں‘ کے ہاتھوں ہی نہیں بلکہ دہشت گردی کے خلاف بین الاقوامی فوج کی کارروائیوں میں بھی ہلاک ہو رہے ہیں۔

حامد کرزئی اقوام متحدہ کے انسانی حقوق کے چارٹر کی 58 سالگرہ کے موقعے پر خطاب کر رہے تھے۔

افغانستان کے حالات کا تذکرہ کرتے ہوئے اور افغان قوم کی بے بسی پر صدر کی آنکھوں میں آنسو بھر آئے۔

انہوں نے کہا کہ افغانستان اس قابل نہیں ہے جو پاکستان سے آنے والوں کو روک سکے یا وہ بین الاقوامی فوج کی دہشت گردوں کے خلاف کارروائیوں پر کوئی بات کر سکے۔

انہوں نے کہا ان دونوں عوامل کی وجہ سے افغان بچے ہلاک ہو رہے ہیں۔

افغانستان کے حکام اکثر پاکستان پر طالبان کو پناہ فراہم کرنے کا الزام عائد کرتے رہتے ہیں۔ تاہم پاکستان ان الزامات کی تردید کرتا ہے اور اس کا کہنا ہے کہ دہشت گردی کے خلاف عالمی جنگ میں اس نے سب سے بڑھ کر کردار ادا کیا ہے۔