Sunday, 12 November, 2006, 15:09 GMT 20:09 PST

بلیئر عراقی پینل سے بات کریں گے

ٹونی بلیئرعراق میں فوجی لائحہ عمل کی تبدیلی پرغور کرنے والے ٹاسک فورس کو ثبوت فراہم کریں گے۔

وزیراعظم ٹونی بلیئر ویڈیو لنک کے ذریعہ منگل کو عراق کے معاملے پر مطالعہ کرنے والے پینل کےاراکین سے بات چیت کریں گے۔اس پینل کی قیادت امریکہ کے سابق نائب وزیر خارجہ جیمز بیکر کر رہے ہیں۔

اس سےایک روز پہلےاس پینل سے امریکی صدر جارج بش ملاقات کریں گے۔

بتایا جا رہا ہے کہ عراق میں غیرملکی فوج کی موجودگی پر یہ پینل دو طرح کےمتبادل پر غور کررہا ہے۔ ان میں سے ایک امریکی فوج کی مرحلے وار واپسی ہے تو دوسرا شام اور ایران کے ساتھ رابطہ بڑھانے پر غور کرناہے، تاکہ جنگ روکنے میں ان کی مدد لی جا سکے۔

ڈاونگ سٹریٹ کے ترجمان کا کہنا ہے کہ بلیئر بات چیت کے دوران بیکراور ان کے پینل کےدیگراراکین کو اس موضوع پر برطانیہ کا نقتہ نظربتائیں گے۔

لبرل ڈیموکریٹ کے رہنما سرمینز کیمپبیل نے کہا ’ یہ غیر مناسب بات ہے کہ وزیر اعظم ایک امریکی پینل کو ثبوت فراہم کریں اور اس متعلق برطانیہ کی پارلیمینٹ میں بات کرنے سے گریز کریں‘۔

انہوں نے کہا’ مسٹر بلیئر کو پارلیمینٹ میں اس معاملے پر وضاحت پیش کرنی چاہیے۔‘

دوسری طرف ڈاونگ سٹریٹ نے مینزس پرالزام لگایا ہے کہ وہ عوام کے ساتھ رابطے میں نہیں ہیں۔

امید کی جا رہی ہے کہ مذکورہ پینل عراق سے متعلق پالسی پر اپنی رپورٹ اس برس کے آخر تک پیش کر دیگی۔