Thursday, 12 October, 2006, 06:20 GMT 11:20 PST

شمالی کوریا پر پابندیوں کا مسودہ

امریکی سفارتکاروں نے اقوام متحدہ میں شمالی کوریا کے خلاف پابندیوں پر قرار داد کا ایک مجوزہ مسودہ تقسیم کیا ہے۔

یہ پابندیاں سوموار کو شمالی کوریا کے پہلے ایٹمی تجربہ کے جواب میں کروائی جا رہی ہیں۔

شمالی کوریا کا ایٹمی تجربہ

اقوام متحدہ میں امریکی سفیر جان بولٹن کے مطابق یہ مسودہ جمعرات کو پیش کیا جا رہا ہے اور انہوں نے امید ظاہر کی اس پر ووٹنگ جمعہ کو ہوگی اور یہ ایک ہفتے تک منظور ہو جائے گا۔

اس مسودے میں شمالی کوریا کے میزائل اور ایٹمی پروگراموں کو نشانہ بنایا گیا ہے۔

	شمالی کوریا نے کہا ہے کہ امریکی دباؤ جنگ شروع کروا سکتا ہے

دوسری طرف شمالی کوریا نے دھمکی دی ہے کہ اگر جاپان اور امریکہ سخت ترین پابندیوں کی بات کرتے رہے تو وہ بھی اس کا جواب دے گا۔

شمالی کوریا کہ ایک اہلکار نے جاپان سے کہا ہے کہ وہ جواب میں کچھ بھی کر سکتے ہیں۔

ایک اور اہلکار نے کہا ہے کہ امریکہ کا دباؤ جنگ شروع کروا سکتا ہے۔

سلامتی کونسل کے رکن ممالک اس بات پر متفق ہیں کہ شمالی کوریا کے خلاف پابندیاں عائد ہونی چاہئیں تاہم ان پابندیوں کی شدت پر ابھی اتفاق نہیں ہے۔

امریکہ کا مطالبہ ہے کہ یہ پابندیاں اقوام متحدہ کے چارٹر کے آرٹیکل 7 کے تحت ہوں یعنی یہ نہ صرف لازمی ہوں بلکہ ان پر عمل نہ ہونے کی صورت میں فوجی کارروائی ممکن ہو۔

چین، روس اور جنوبی کوریا اس تجویز کے حق میں نہیں ہیں۔

چین نے اپنے ایک اعلیٰ اہلکار کو امریکہ روانہ کیا ہے جو راستے میں ماسکو رکے گا۔

اطلاعات کے مطابق چین کو شمالی کوریا آنے جانے والے کارگو جہازوں کے معائنہ کو لازمی بنانے پر بھی اعتراض ہے۔

چین اور جنوبی کوریا کو خدشہ ہے کہ ایسے معائنوں کے رد عمل میں شمالی کوریا فوجی کارروائی کر سکتا ہے جو کہ ان دونوں ممالک کے لیئے خطرناک ہے۔

قراداد کے اس مجوزہ مسودے میں حکومتوں کو یہ حق بھی حاصل ہوگا کہ وہ شمالی کوریا کے جوہری پروگرام کی حمایت کرنے والے کسی مشتبہ شخص کو اپنے ملک میں داخل ہونے سے روک سکیں۔

حالیہ مسودے میں ذرا نرم زبان استعمال کی گئی ہے لیکن پھر بھی اس کے تحت فوجی کارروائی کے ذریعے پابندیاں لگائی جا سکتی ہیں اور شمالی کوریا جانے والے جہازوں اور مال کا معائنہ کیا جا سکتا ہے۔