Sunday, 01 October, 2006, 03:05 GMT 08:05 PST

لبنان سے اسرائیلی انخلاء مکمل

حزب اللہ اور اسرائیل کے درمیان حالیہ جنگ بندی کے بعد لبنان سے اسرائیلی فوجیوں کی واپسی اب مکمل ہوگئی ہے۔

لبنان سے اسرائیل کا آخری فوجی اتوار کی صبح واپس چلا گیا۔ خیال کیا جاتا ہے کہ 200 اسرائیلی فوجی جو وہاں موجود تھے سنیچر اور اتوار کی شب چلے گئے۔

حزب اللہ اور اسرائیل کے درمیان جنگ بندی پر عمل کرانے کے لیے لبنانی اور بین الاقوامی فوجی تعینات کیے گئے ہیں۔

اسرائیلی فوج کے ایک ترجمان نے بتایا: ’لبنان کی ذمہ داری اس وقت لبنانی حکومت اور بلاشبہ اقوام متحدہ پر ہے، لہذا حزب اللہ کا ہر قدم لبنان کی ذمہ داری ہے۔‘

دونوں ملکوں کی سرحد پر موجود بی بی سی کے نامہ نگار کا کہنا ہے کہ اگرچہ واپس ہوتے ہوئے اسرائیلی فوجی مسکرارہے تھے تاہم فتح کا ماحول نہیں تھا۔

ابھی بھی دو اسرائیلی فوجی حزب اللہ کے قبضے میں ہیں جس کی وجہ سے یہ جنگ شروع ہوئی تھی۔ ہمارے نامہ نگار کا کہنا ہے کہ بیشتر اسرائیلی سمجھتے ہیں کہ حزب اللہ کے ساتھ لڑائی ابھی ختم نہیں ہوئی ہے۔

ہمارے نامہ نگار کا کہنا ہے کہ لبنان سے واپس ہوتے ہوئے فوجیوں کا کہنا تھا کہ انہیں دوبارہ لبنان میں جانا پڑسکتا ہے۔ لبنان اور حزب اللہ کے درمیان یہ جنگ چونتیس روز جاری رہی تھی۔